ڈاکٹر محمد طارق فیصل آباد، سوئٹزر لینڈ اور جرمنی سے تربیت یافتہ ماہر جینیات ہیں۔ جب جولائی 2009ءمیں انھوں نے لمز سکول برائے سائنس اور انجینئرنگ میں ایک  نوجوان محقق اور مُدَرِّس کے طور پرکام کاآغاز کیا تو نہ جانے انھیں ہمارے سکول کے خالی دَر و دیوار میں کیا نظر آیا کہ انھوں نے مغرِب کی بہترین تجربہ گاہوں کو خیر باد کہہ کے اِس خالی  بیابان میں اپنا مستقبل آزمانے کی ٹھان لی۔ کِسے معلوم تھا کہ یہ شخص  نہ صرف کیمیائی حیات، جینیات، بالائی جینیات (epigenetics)اور حیوانی نشوونُما (developmental biology)کےرُمُوز سے ہی آشنا نہیں، بلکہ جذبے اور عملِ پیہم سے سرشاُر ملک  میں موجود  اگلی نسلوں کی فکری رہنمائی میں اپنی جان لگا دینے سے بھی پیچھے نہیں ہٹے گا۔

ڈاکٹر محمد طارق نے سکول کے خالی آشیانے میں مکّھیوں کا ایک کاشانہ بنایا اور اس مشاہدہ گاہ میں جدید ترین کیمیائی اورجینیاتی تکنیکوں کا سہارا لے کے حیوانی جسم میں نشوونما کے مختلف مظاہر پہ تحقیق کا کام بڑی سربلندی اور جانفشانی کے ساتھ کیا۔ اس عمل میں نہ صرف انھوں نے مکھی کےنمونے کو استعمال کرتے ہوئے پاکستان میں اپنی نوع کی اولین تجربہ گاہ قائم کی، بلکہ اپنی ولولہ انگیز اور حکمت بھری تدریس کے ذریعے ہزاروں طلبہ اورطالبات کو مستقبل میں اونچی سوچ رکھنے اور خود اعتمادی سے، دنیا کے شانہ بشانہ، عالمی پائے کی تحقیق اور جستجو کے قابل بنا دیا۔ آج آپ کے شاگرد دنیا کے کونے کونوں کی بہترین یونیورسٹیوں میں تحقیق اور تعلیم کے شعبوں سے منسلک ہیں اور ہماری ملی اور قومی اُمّید کو ٹوٹنے سے بچائے رکھتے ہیں۔
بالائی جینیات اور حیوانی نشوونما کے عالمی ماہروں نے ڈاکٹر محمد طارق کے کام کو سراہا۔موصوف نے ایک دُور اندیش  مُر بّی کی طرح سکول میں کئی نئے منصوبوں کا آغاز کیا خواہ ان کا تعلق ہماری تعلیم سے ہو یا تحقیق سے، شعبہ حیاتیات کےصدر کی حیثیت سے کئی سال تک اس شعبے کو ترقی کی راہ پر گامزن رکھا اور سب سے بڑھ کر کمال محبّت سے بہت سے دیگر اساتذہ کی رہنمائی بھی کی، جن میں سے بیشتر اِنھی ڈاکٹر طارق کی ترغیب پہ ہمارےسکول کی علمی تحریک سے وابستہ ہوئے۔ ڈاکٹر طارق کو دیکھ کے مجھے لگتا ہے کہ "اُستاد ایسا ہی ہونا چاہیے"۔ درد مند، مُفَکّر، سائنس کا بہترین مُبَلّغ اور سماجی سوچ کا پرچارک۔ اپنے طلبہ اور ساتھیوں کے لیے" رول ماڈل"۔
واقعی یہ ہمارے لیے بہترین مثال ہیں۔ ہمارے پروفیسر ہمارے ادارے اور ملک کا اثاثہ ہونے چاہییں۔ یہی خیال ہمیں اس جانب لے آیا کہ آج مجھے ڈاکٹر محمد طارق کو لمز سکول برائے سائنس اور انجینئرنگ میں بطور پروفیسر تعینات کرنے کا اعلان کرنے میں اعزاز اور خوشی محسوس ہو رہی ہے۔ اُمید ہے کہ پروفیسر ڈاکٹر محمد طارق آنے والے سالوں میں ہمارے ادارے اور ہمارے ملک میں حیاتیاتی علوم پر تحقیقات کے میرِ کارواں بنے رہیں گے اور ہمارے ذہنوں کو منوّر اور  دلوں کو بھی گر ماتے رہیں گے۔

---

محمد صبیح انور ، پروفیسر طبیعیات
 

حالیہ دور میں جہاں انسانوں کو بہت سی جان لیوا بیماریوں کا سامنا ہے وہیں کینسر جیسا موذی مرض سر فہرست ہے۔ کینسر ایک ایسی خطر ناک بیماری ہے جو انسانی جسم میں موجود ڈی این اے میں تبدیلی کی وجہ سے جنم لیتی ہے۔ اس کے نتیجے میں غیر ضروری اور غیر معمولی خلیوں کے جتھے کے جتھے تشکیل پاتےہیں جو بعد میں ٹیومر کی شکل اختیار کر کے پورے جسم  میں پھیل جاتے ہیں

 

 

 دنیا بھر میں ہر سال کینسر کے مرض میں مبتلا ہونے والے اور اس کی وجہ سے جان کی بازی ہارنے والے افراد کی تعداد تشویشناک ہے۔ اس سے قبل کینسر کے شعبے میں لا علمی اور محدود شعور کے باعث اس مہلک مرض میں مبتلا ہونے والا شخص جینے کی تمام امیدیں کھو بیٹھتا تھا ۔ لیکن موجودہ دور میں کینسر کے علاج سے متعلق اہم پیشرفت سامنے آئی ہے جس سے کینسر کے مریضوں کی زندگی میں امید کی نئی کرن روشن ہوئی ہے۔
اس حوالے سے مزید جاننے کے لئے ہم نے ماہر کینسر تحقیق ڈاکٹر عمر خالد کا انٹرویو کیا۔ ڈاکٹر عمر خالد نے پنجاب یونیورسٹی کے مائیکروبائیولوجی اور جینیٹکس کے ڈیپارٹمنٹ سے بیچلرز کی ڈگری حاصل کرنے کے بعد ۶۰۱۴ میں لمز یونیورسٹی کے ماسٹرز پروگرام میں داخلہ لیا۔ یہاں آپ دو سال تک حیاتیات شعبے سے منسلک رہے جہاں آپ کا شمار تعلیمی فضیلت پانے والے طلبہ میں ہوتا تھا اور اس کے بعد دیگر اساتذۃ کے ساتھ ایک سال تک آپ نے تحقیقی اور تدریسی معاون کی خدمات سر انجام دیں۔

اسی دوران آپ کو دنیا کے نامور کینسر تحقیق سینٹر سے پی ایچ ڈی کی آفر آئی جہاں سے آپ نے کینسر کے شعبے میں تین سال میں اپنی پی ایچ ڈی مکمل کی۔ بعد اذاں ڈاکٹر عمر کو ہارورڈ میڈیکل اسکول کے دانا فاربر کینسر انسٹی ٹیوٹ میں بطور کینسر تحقیق سائنس دان کام شروع کرنے کا موقع مل گیا۔

 

 

ڈاکٹر عمر سے گفتگو کے دوران ہمیں ان کے کام کی نوعیت کا بخوبی اندازہ ہوا ہے۔ان کا کہنا تھا کہ بطور کینسر کار ، وہ ایسی جدید تحقیق پر کام کر رہے ہیں جس سے کینسر جیسے مرض کے علاج کو قابلِ عمل بنایا جا سکے ۔ ان کا مقصد مختلف مریضوں میں کینسر کی پیشرفت کو سمجھنا، کینسر علامات کی شناخت کرنے کے بعد ہر انفرادی کیس کو زیر غور رکھتے ہوئے منفرد اور اثر انگیز تراکیب اور اقدامات کو تجویز دینا ہے جس سے کینسر کے مرض کا پھیلاؤ  نہ صرف تھم جائے بلکہ یہ مکمل طور پر جسم سے خارج بھی ہو جائے۔

انھوں نے مزید بتایا کہ ان کے پی ایچ ڈی پروجیکٹ کا موضوع ایسی منفرد علاجی تراکیب تشکیل دینا تھا جو دماغ کے کینسر میں مبتلا لوگوں کو کم ترین مضر اثرات کے ساتھ شفا دے سکے ۔ اس حوالے سے انھوں نے اہم کامیابی تب حاصل کی جب انہوں نے دو ایسی ادویات کے فارمولے تیار کیے جو اس مقصد میں نہایت کارگر ثابت ہوئیں۔

 

 

جب ہم نے ڈاکٹر خالد سے پوچھا کے کینسر کے متعلق تحقیق کا اشتیاق کیسے پیدا ہوا تو ان کا کہنا تھا کہ یہ خیال سب سے پہلے ان کے ذہن میں تب پیدا ہوا جب انھوں نے پہلی بار لمز میں ڈاکٹر امیر فیصل کے ساتھ سیل سگنلنگ کا کورس لیا جس میں خلیوں کے درمیان رابطوں کو سمجھنے کی کوشش کی جاتی ہے ۔ انھوں نے مزید کہا کہ ریسرچ تحقیقی معاونت کے دوران رونما ہونے والے سوالات اور ان کے جوابات حاصل کرنے کی جستجو نے ان کے اندر ایک نیا جذبہ پیدا کیا۔

مزید یہ  کہ لمز کے اساتذہ نے ان کی کامیابی کی کہانی میں ایک اہم کردار ادا کیا۔ ان کا ماننا تھا کہ لمز میں موجود ڈاکٹر شہزاد الحسن جیسے اساتذہ کی مسلسل رہنمائی اور ہدایت کے سبب انہیں اپنے کام میں مہارت اور خود اعتمادی حاصل ہوئی۔

اپنی کہانی ختم کرتے ہوئے ڈاکٹر خالد کا کہنا تھا کہ جس تیزی سے اس شعبے میں میڈیکل سائنس ترقی کر رہی ہے،وہ وقت دور نہیں جب کینسر کی تشخیص و علاج نہایت آسان اور موثر ہو جائیں گے ۔ جو طلبہ کینسر سے متعلق تحقیق میں دلچسپی رکھتے ہیں، انھیں ڈاکٹر عمر خالد کا مشورہ ہے کہ اپنے سوالات کے جوابات کی کھوج جاری رکھیں اور ساتھ ہی ساتھ ڈیٹا پروسیسنگ اور بائیوانفارمیٹکس کے ہنر میں مہارت حاصل کریں۔ ڈاکٹر خالد کا کینسر کے علاج کی تشخیص کے حوالے سے جوش و جذبہ اس میدان میں تجدیدی عمل کے امکانات اور بہترین مستقبل کی نوید سناتا ہے جو کینسر میں مبتلا افراد کے لئے امید کی ایک  نئی اور واضح کرن ہے۔

 

 

 

حیاتیاتی تنوع (1) ہماری زمین کا خاصہ ہے۔ پودوں اور جانوروں کی کروڑوں قسمیں جو ہمارے رُوئے ارض پہ آباد ہیں، نہ صرف ہماری زندگیوں کو خوبصورت بناتی ہیں بلکہ ان کا عددی توازن اور ان کی موجودگی ہمارے ماحول، آب و ہوا اور زمینی رنگا رنگی کے لیے بھی نہایت اہم ہے۔ جب انسانی سماج کی  آویزش سے یہ توازن بگڑتا ہے، وہاں نسلوں کی نسلیں اپنی سانسوں کی بقا کے لیے ترس جاتی ہیں اور بالآ خر معدوم ہو جاتی ہیں۔ تہذیبِ حاضر کا ایک بڑا چیلنج یہ ہے کہ کسی طرح  حیاتیاتی تنوع کی نگہداشت کی جائے اور اس کی بوقلُمونی کو انسانی صنعت، نقل و حمل اور تہذیبی ترقی کی  دستبرد سے بچایا جائے۔ یہ ایک عالمی فریضہ ہے۔

^{میلیا ایزیڈراچ، جسے عام طور پر چائنا بیری ٹری، بیڈ ٹری، کیپ لیلک، سرنگا بیری ٹری، یا سفید دیودار کے نام سے جانا جاتا ہے، مہوگنی فیملی میں درخت کی ایک قسم ہے، یہ مقامی طور پر انڈومالیا اور آسٹریلیشیا میں پایا جاتا ہے۔} 

اسی مشترک عالمی فریضے میں سے ایک اہم قدم لمز میں شعبہ حیاتیات کے رکن ڈاکٹر شہزاد الحسن اور ان کے ساتھیوں نے اٹھایا اور ہمیں اپنی تحقیق سےیہ باور کرایا کہ ہماری یونیورسٹی نہ صرف ایک تعلیمی ادارہ ہے، بلکہ حیاتیاتی تنوع کا ایسا حسین اور وافر ذخیرہ بھی ہے جو دل و دماغ کو نہ صرف تازگی دیتا ہے، بلکہ فطرت شناسوں کے لیے تحقیق اور مطالعے کا سامان بھی فراہم کرتا ہے۔ "لمز کی حیاتیاتی  رنگا رنگی (2)" کے عنوان سے یہ منصوبہ دراصل ادارے کا عزم ہے کہ ہمارے سو ایکڑ سے زائد رقبے پر محیط تعلیمی درسگاہ میں موجود نباتاتی اور حیوانی زندگی کے بارے میں معلومات اکٹھی کی جائیں۔

  اس منصوبے کے پہلے مرحلے میں کیمپس میں موجود تمام درختوں،  پرندوں اور پودوں کی نشاندہی کی گئی اور ان کے محّلِ وقوع کی جغرافیائی سند اکٹھی کی گئی۔ پتہ یہ چلا کہ پنجاب بھر میں موجود مقامی نباتات کی تمام انواع  ہمارے لمز میں موجود ہیں۔ نیز 105  نباتاتی  انواع جن میں نایاب پودے بھی شامل ہیں،  ہمارے باغات کی زینت ہیں۔  علاوہ ازیں مہاجر پرندے (3)، حشرات الارض،  رینگنے والے جانور(4)، اور بھانت بھانت کے پھول اس باغ کا حصہ ہیں۔ یہ سب کچھ کسی انمول خزانے سے کم نہیں۔ ہم روز اس چھُپی ہوئی زندگی سے صرفِ نظر کرتے آگے گزر جاتے ہیں مگر ڈاکٹر شہزاد الحسن کا انمول کام ہمارے قدموں کو روک روک کے ہمیں دعوتِ نظارہ دے رہا ہے۔

^{پرپل سن برڈ سن برڈ فیملی کا ایک چھوٹا پرندہ ہے جو بنیادی طور پر جنوبی اور جنوب مشرقی ایشیا میں پایا جاتا ہے۔} 

یہ منصوبہ شہزاد الحسن کی زیر نگرانی گورنمنٹ کالج یونیورسٹی لاہور کے شعبہ نباتیات کے تعاون سے مکمل ہوا۔  یہ پروجیکٹ اس بات کا اعلان ہے کہ اسکول آف سائنس اینڈ انجینئرنگ حیاتیاتی ماحول کے بارے میں متفکر ہے اور نوجوانوں کی توجہ اس جانب دِلانا چاہتا ہے۔ اگر ہم نے اس خوبصورت اور متوازن ماحول کی حفاظت نہ کی تو نہ صرف ہم زندگی کے حُسن میں کمی لے آئیں گے بلکہ اپنے آپ کو نئے نئے حوادث کے لیے بھی پیش کر دیں گے۔

 اس منصوبے کی مزید تفصیلات کے بارے میں جاننے کے لیے یہاں کلک کریں۔

اور مجھے تو احمد شمیم کی یہ لازوال نظم یاد آ گئی جسے مرحومہ نیرّہ نُور کی آواز نے مزید لا فانی بنا دیا۔

 کبھی ہم خوبصورت تھے ۔۔۔ ۔۔۔ ۔!

کتابوں میں بسی خوشبو کی صورت
سانس ساکن تھی!
بہت سے ان کہے لفظوں سے تصویریں بناتے تھے
پرندوں کے پروں پر نظم لکھ کر
دور کی جھیلوں میں بسنے والے لوگوں کو سناتے تھے
جو ہم سے دور تھے
لیکن ہمارے پاس رہتے تھے !
نئے دن کی مسافت
جب کرن کے ساتھ آنگن میں اترتی تھی
تو ہم کہتے تھے۔۔۔ ۔۔امی!
تتلیوں کے پر بہت ہی خوبصورت ہیں
ہمیں ماتھے پہ بوسا دو
کہ ہم کو تتلیوں کے،جگنوؤں کے دیس جانا ہے
ہمیں رنگوں کے جگنو، روشنی کی تتلیاں آواز دیتی ہیں
نئے دن کی مسافت رنگ میں ڈوبی ہوا کے ساتھ
کھڑکی سے بلاتی ہے
ہمیں ماتھے پہ بوسا دو۔۔۔

کہانی نویس: ڈاکٹرمحمد صبیح انور

 

 

---

فرہنگ

(1) Biological diversity
(2) Flora and fauna of LUMS
(3) Migratory birds
(4) Reptiles

 کسی بھی زبان کی شاہراہِ ترقی کا ایک سنگِ نشان یہ بھی ہوتا ہے کہ اُس زبان میں مختلف انواع کے مضامین اور موضوعات کس قدر اور کس طرح ادا کیے جا سکتے ہیں؟ اردو زبان کے بارے میں عام طور پر خیال کیا جاتا ہے کہ سماجی اور عمرانی علوم سے متعلق مباحث تو اِس زبان میں کسی قدر سہولت سے ادا کیے جا سکتے ہیں مگر یہ زبان جدید سائنسی مباحث، بڑی حد تک بیان کرنے سے قاصر ہے۔

یہ رائے عام طور پر زیادہ تر عمومی ناواقفیت اور چند غلط فہمیوں کی زائدہ ہے۔ یہ بیّن حقیقت ہے کہ اردو زبان میں متفرق سائنسی موضوعات کو بیان کرنے کی خاطر متعدد کوششیں اٹھارھویں صدی کی تیسری دہائی ہی میں شروع ہو گئی تھیں۔ مثلاً حیدر آباد دکن میں ۱۸۳۴ء میں نواب شمس الامراء کی سرپرستی میں ایک ’دارالترجمہ‘ کی بنیاد رکھی گئی، جہاں ریاضی، طبیعات، کیمیا، علم الادویہ، جیومیٹری، فلکیات اور دیگر علوم پر مختلف کتب یورپی زبانوں سے اردو میں ترجمہ کی جاتی تھیں۔ اسی دور میں لکھنؤ میں اودھ کے بادشاہ نصیر الدین حیدر کی سرپرستی میں سائنسی علوم سے متعلق چند کتب انگریزی سے اردو میں منتقل ہو رہی تھیں۔

The History of Rasselas: Prince of Abissinia 
سیموئل جانسن کا ایک معروف انگریزی ناول، جس کو اردو میں ’تواریخ راسلس‘ کے عنوان سے منتقل کرنے والے کمال الدین حیدر عرف محمد میر لکھنوی کا نام اس حوالے سے قابل ذکر ہے کہ انھوں نے اس دور میں سائنسی موضوعات پر تقریباً اٹھارہ کتب کو اردو میں منتقل کیا ۔ ۱۸۲۵ء میں قائم ہونے والے دہلی کالج اور اسی کالج میں ۱۸۴۳ء میں قائم ہونے والی دہلی ٹرانسلیشن سوسائٹی کی خدمات بھی اس حوالے سے بہت نمایاں ہیں۔ کالج اور سوسائٹی کے زیر اہتمام متنوع علوم پر تقریباً سوا سو کتب ترجمہ کی گئیں، جن میں نمایاں تعداد سائنسی کتب کی تھی۔ سوسائٹی کے کارپرداز اس حوالے سے خاصے روشن خیال ثابت ہوئے کہ اس زمانے میں انھوں نے اردو میں ترجمے کے جو اصول وضع کیے تھے، بڑی حد تک آج بھی غیر متعلق نہیں ہوئے ہیں۔

انیسویں صدی ایسے ہی اداروں اور کاوشوں میں ایک نام تھامسن سِوَل انجینئرنگ کالج، رڑکی (پہلا نام: سول انجینئرنگ کالج) کا بھی ہے۔ رڑکی، سہارن پور اور ہردوار کے قریب ایک قصبہ ہے، جو اُس وقت شمال مغربی صوبے یا اتر پردیش کا حصہ تھا۔ آج کل رڑکی شہر، ریاست اتراکھنڈ کا حصہ ہے۔ اس کالج کا امتیاز یہ تھا کہ ۱۸۴۷ء میں اس کے قیام سے لے کر تقریباً ۱۸۷۰ء تک، ہندوستانی باشندوں کو سول انجینئرنگ کی جملہ تعلیم اردو زبان میں دی جاتی رہی۔

یہاں اس کالج کے قیام کا مختصر پس منظر بتانا ضروری معلوم ہوتا ہے۔ دوسری اینگلو مراٹھا جنگ (۱۸۰۵ء تا ۱۸۰۳ء)  سے لے کر دوسری جنگ پنجاب (۱۷۴۹ء) کے خاتمے پر انگریز، شمال مغربی صوبہ جات (اُتر پردیش)، صوبہ جاتِ وسطی (مدھیہ پردیش)، بہار، مہاراشٹر، گجرات، راجستھان، سندھ، بلوچستان، شمال مغربی سرحدی صوبے (خیبر پختونخواہ) پر بلاواسطہ یا بالواسطہ متصرف ہو چکے تھے۔ ان علاقوں پر سیاسی لحاظ سے غلبہ برقرار رکھنے کے لیے ضروری تھا کہ یہاں کے قدرتی وسائل (مثلاً دریاؤں، زرخیز زمینوں، زرعی پیداوار وغیرہ) سے حتی المقدور فائدہ اٹھایا جائے۔ دوم یہ کہ یہاں پہ عمومی ترقیاتی کاموں کا جال سا بچھایا جائے۔ مثلاً پہلے سے موجود سڑکوں کو ترقی دی جائے، نئی سڑکیں اور راستے بنائے جائیں، ریلوے ٹریک بچھائے جائیں، تار (ٹیلیگراف) کا نظام قائم کیا جائے وغیرہ وغیرہ۔ اس حکمتِ عملی کا انھیں دوہرا فائدہ یہ ہونا تھا کہ جہاں یہ کام ہندوستانی باشندوں کی نظر میں ان کی قدر بڑھاتے وہیں ان سب علاقوں میں انگریز سپاہ کی بآسانی نقل و حمل اور دور دراز کے علاقوں تک ان کی رسائی کو ممکن بناتے۔ یوں انگریزی اقتدار کی قوتِ نافذہ میں اضافہ ہوتا۔ ان مشکل اور طویل مدتی منصوبوں کے لیے ماہر سول انجینئرز اور ان کے معاونین کی ضرورت تھی جو اس نوعیت کے کاموں کو تکمیل تک پہنچا سکیں۔ 

یوں تو اس زمانے میں شمال مغربی صوبے (اتر پردیش) میں انگریزوں کے زیرِ انتظام تین کالج (دہلی کالج، آگرہ کالج، بنارس کالج) قائم ہو چکے تھے اور ۹ اینگلو ورنیکولر اسکول بھی خدمات انجام دے رہے تھے، مگر فنّی اور تکنیکی تعلیم کے لیےمخصوص ادارہ کوئی نہیں تھا۔ لہٰذا کمپنی کے مقبوضات میں عام طور پر اور خاص کر شمال مغربی صوبے میں جاری عمومی ترقیاتی کاموں کے لیے اہلکار کو مہیا کرنے کے لیے ۲۵ نومبر ۱۸۴۷ء کو سول انجینئرنگ کالج، رڑکی کا قیام عمل میں لایا گیا۔ ابتدا میں کالج کا نام کالج آف سول انجینئرنگ رکھا گیا اور لیفٹیننت آر۔میکلیگن کو کالج کا پرنسپل مقرر کیا گیا۔ ۱۸۵۴ء میں کالج کا نام تبدیل کر کے تھامسن انجینئرنگ کالج، رڑکی رکھ دیا گیا۔ آغاز میں طلبہ کے تین زمرے قائم کیے گئے، دو  زمرے یورپی کمیشنڈ اور نان کمیشنڈ افسروں کے لیے جبکہ تیسرا زمرہ مقامی ہندوستانی طلبہ کے لیے مخصوص کیا گیا۔ کالج کے قیام سے لے کر کم از کم ۱۸۷۰ء تک ہندوستانی طلبہ کے لیے ذریعہ تعلیم کے لیے اردو زبان کو اختیار کیا گیا۔ کالج کی مساعی سے قبل سول انجینئرنگ کے موضوعات پہ اردو میں کوئی کام نہیں ملتا تھا۔ اگرچہ ریاضیات، ہیئت، فلکیات، جغرافیہ، جبر  و مقابلہ، مساحت وغیرہ پہ کچھ نہ کچھ مواد ہم دست تھا لیکن سول انجینئرنگ سے متعلقہ موضوعات اردو میں منتقل نہیں ہوئے تھے۔ لہٰذا کالج انتظامیہ نے اس حوالے سے بنیادی نوعیت کے مضامین پر کتب ترجمہ کروانی شروع کیں۔ 
اس سلسلے کا آغاز ۱۸۵۰ء سے قبل ہی ہو گیا تھا۔ ۱۸۵۰ء کے بعد سے تسلسل سے مطبوعات سامنے آنا شروع ہو گئیں۔ زیادہ کتب تو اردو میں ہی شائع ہوئیں لیکن چند کتب ناگری حروف میں بھی شائع ہوئیں۔ اس زمانے کی چند دستیاب کتب بکھری ہوئی حالت میں برصغیر کے مختلف کتب خانوں میں موجود ہیں۔  

راقم کی تلاش و تحقیق کے نتیجے میں پہلی مرتبہ رڑکی کالج سے شائع ہونے والی چونتیس (۳۱ اردو اور ۳ ناگری حروف میں) کتب کی فہرست تیار کی گئی ہے۔ ذیل میں ایک جدول ترتیب دیا گیا ہے جس کے ذریعے کتب کے نام، ان کے مصنفین و مترجمین، سنہ اشاعت اور تعداد صفحات، جیسی معلومات درج کی جا رہی ہیں۔ جہاں کچھ معلومات میسر نہیں آ سکیں وہاں --- کا نشان لگا دیا گیا ہے۔ یہ فہرست چونکہ اب تک کے تحقیقی کاموں میں پہلی مرتبہ مرتب کی گئی ہے، اس لیے اس میں مزید بہتری کی گنجائش یقیناً باقی ہے۔  
 
کالج کی دستیاب تصانیف و تالیفات کے جائزے سے یہ بات واضح ہوتی ہے کہ کالج کے نمایاں مصنفین و موَلفین میں رائے منّو لال (فرسٹ نیٹو ماسٹر بعد ازاں ہیڈ نیٹو ماسٹر)، لالہ بہاری لال (فرسٹ نیٹو ماسٹر،بعد ازاں ہیڈ نیٹو ماسٹر)، کنہیا لال (سب اسسٹنٹ سول انجینئر)، شنبھو داس (اسسٹنٹ نیٹو ماسٹر، نیٹو سروینگ ماسٹر)، شیخ بیچا (اسسٹنٹ نیٹو ماسٹر، سیکنڈ نیٹو ماسٹر)، موہن لال اور جگ موہن لال شامل تھے۔ 

عموماً کالج سے چھپنے والے رسائل کے سرِ ورق کی عبارت یوں ہوتی تھی:

رسالے 

جو کہ واسطے طلبائے مدرسہ رڑکی کے تیار 

کیے گئے ہیں 

رسالہ نمبر دوم 

در باب مضبوطی اشیائے سامان عمارت کے 

ترجمہ کیا ہوا منو لعل 

اول نیٹو ماسٹر مدرسہ رڑکی کا سنہ ۱۸۵۱ء 

کالج کی تاسیس کے وقت سے تقریباً ایک چوتھائی صدی تک مقامی ہندوستانیوں کو اردو زبان میں ہی تعلیم دی جاتی رہی۔ اس مقصد کے لیے ان موضوعات سے متعلق زیادہ تر انگریزی کتب کو اردو میں منتقل کیا گیا۔ افادی پہلو کو مد نظر رکھتے ہوئے کالج کے نصاب میں شامل کتب ہی اس کام کے لیے منتخب کی گئیں۔ 

یہ نکتہ بھی قابلِ توجہ ہے کہ کالج میں ہندوستانی طلبہ کی تدریس کے لیے ذریعہَ تعلیم، اردو زبان کو منتخب کیا گیا۔ کالج کیلنڈر ۱۸۷۱ سے ۱۸۷۲ء میں کالج کے ہندوستانی طلبہ کی فہرستوں پر نظر ڈالنے سے باآسانی اندازہ ہو جاتا ہے کہ کالج میں مسلمان اور ہندو طلبہ کی شرح تقریباً یکساں تھی۔ ہندو طلبہ میں سے بیشتر کا تعلق اتر پردیش سے ہی تھا، اس کے باوجود یہ کالج اردو ہندی تنازعہ سے دور تھا۔ اسی باعث کالج کی بیشتر تالیفات اردو رسم الخط میں جبکہ محض چند ایک کتب ناگری رسم الخط میں شائع ہوئیں۔ اس سے یہ بھی معلوم ہوتا ہے کہ انیسویں صدی کی تیسری چوتھائی تک بھی شمالی ہندوستان میں اردو زبان اور رسم الخط کو بیشتر طبقات میں، مذہبی و ثقافتی بُعد سے قطعِ نظر، قبولِ عام حاصل تھا۔ 

ایک سوال یہ پیدا ہوتا ہے کہ کالج میں ہونے والا تالیفی کام اتنے محدود پیمانے پر کیوں تھا؟ تو یہ بات خاطر نشان رہے کہ تھامسن سول انجینئرنگ کالج، رُڑکی کے قیام کا اصل مقصد سول انجینئرنگ کی تعلیم دینا تھا۔ کالج کے منتظمین کی توجہ صرف اس بات پر تھی کہ تدریسی امور سے متعلق کچھ مواد مقامی طلبہ کے لیے تیار کروایا جا سکے۔ اس مقصد کے حصول کے لیے انھوں نے کالج کے مقامی تدریسی عملے میں سے ہی چند اساتذہ کو منتخب کیا ۔ ان اساتذہ نے نصاب سے متعلق چند ضروری کتب کو اردو میں ترجمہ و تالیف کیا۔ اس کوشش میں ان اساتذہ کی ذاتی لیاقت ہی کام آئی۔ ان کی رہنمائی کرنے کو کوئی باقاعدہ ادارہ بھی نہ تھا اور نہ ہی کوئی سرپرست تھا۔اسی باعث کالج میں ہونے والے تصنیفی و تالیفی کام کی تنگ دامانی کھٹکتی ہے مگر اس کے باوجود کالج کے اساتذہ کا یہ امتیاز ہے کہ انھوں نے مقدور بھر کام کے ذریعے ایک نئے چلن کی بنیاد رکھی۔ 

کالج میں ہونے والے تالیفی کام میں موضوعات کے ساتھ ساتھ ان کی پیشکش میں بھی خاصا تنوع پایا جاتا ہے۔ گو موضوعات زیادہ تر سول انجینئرنگ سے ہی متعلق ہیں مگر اکثر ریاضی اور جغرافیہ کے موضوعات سے بھی اعتنا کیا گیا ہے۔ اپنے موضوعات کے تناظر میں کالج کی کتب میں زیادہ تر عملی مشقوں سے متعلق مباحث ہوتے تھے۔ اسی طرح عملی نوعیت کے سوالات اور ان کے حل ہوتے تھے۔ کالج کی تالیفات کے معتدبہ حصوں میں عملی نوعیت کے سوالات اور مشقیں دیکھی جا سکتی ہیں۔ شکلوں اور تصاویر کے ذریعے موضوع کی وضاحت کی جاتی تھی۔ ان کتب کی نثر بھی اکثر و بیشتر صاف تھی اور اس میں اتنی صلاحیت تھی کہ وہ تکنیکی و فنی موضوعات کو بغیر کسی اشکال کے منطقی طور پر پڑھنے والے تک پہنچا سکے۔  

رڑکی کالج میں اردو زبان میں سول انجینئرنگ کے مضامین بیان کرنے کی اس ابتدائی کاوش کے بعد ایک طویل عرصے تک ہمیں اور کوئی کاوش نظر نہیں آتی۔ ۱۹۱۷ء میں جامعہ عثمانیہ اور پھر دارالترجمہ کے قیام نے پھر اس چراغ کو روشن کیا۔ اس ضمن میں یہ امر قابل توجہ ہے کہ منتشر اور وقفے وقفے سے ہونے والی ان کاوشوں کی افادیت کے باوجود مستقل انگریزی ذریعہ تعلیم نے یہ خیال عام کر دیا کہ اردو زبان سائنسی و تکنیکی مضامین بیان کرنے سے بیشتر معذور ہے۔ 

اردو میں تھامسن انجینئرنگ کالج، رڑکی کے اساتذہ، مترجمین و مؤلفین کی یاد نگاری  نہ ہونے کے برابر ہے۔ یہ بات ضرور نشانِ خاطر رہے کہ یہی لوگ تھے جنھوں نے اردو میں خالص فنی و تکنیکی موضوعات بیان کرنے کی داغ بیل ڈالی۔ انگریزی کتب کو ترجمہ کیا، ان کے موضوعات میں مقامی حالات کے تحت اضافے بھی کیے۔ تراجم و تالیفات میں قابلِ ذکر تنوع ہونے کے باوجود اندازِ نثر کی اِکسانیت قائم کرنے میں کافی کامیاب رہے۔ اس اندازِ نثر میں اتنی صلاحیت تھی کہ معمولی خواندہ شخص بھی بغیر کسی اشکال کے زیرِ بحث موضوع کی تفہیم میں آسانی محسوس کرتا تھا۔ تیزی سے کروٹیں لیتے وقت کی زد میں، یہ فاضلین بے شک گم نام سہی مگر ان کے کام کی افادیت اور اہمیت بہرحال مسلّم ہے۔ 

 

کورونا وائرس کی عالمی وباء نے جہاں انسانی ترقی کا امتحان لیا ہے وہاں ہماری خودارادیت کو بھی جھنجھوڑا ہے۔ ۲۰۲۰ شاید کورونا کا سال تھا مگر ۲۰۲۱ اس وباء کے خاتمے کا سال ہو گا۔ دنیا بھر کے بہت سے سائنسدان اس وائرس کے طریق واردات کو سمجھ کر اس کو مفلوج بنانے کی کوشش میں مصروف ہیں۔ لمز میں ڈاکٹر محمد سعید اور ان کی ٹیم، جن کا تعلق شعبہ کیمیا و کیمیائی انجنئیرنگ سے ہے، اسی عالمی کوشش کا حصہ ہیں۔ حال ہی میں ان کی تحقیق سے جڑی ایک اہم پیش رفت ہوئی جس سے یقیناً کورونا وائرس کو شکست دینے میں پیش رفت ہوگی۔ کورونا کی قینچی! جی ہاں۔ کورونا وائرس جب بھی کسی خلیے میں داخل ہوتا ہے تو اس کی پوری مشینری کو اپنے تابع کر لیتا ہے جس سے لاکھوں خلیے وائرس کی فوٹو کاپی مشینیں بن جاتی ہیں۔ اس طرح ایک کورونا وائرس نہایت چالاکی سے اپنے جیسے ہزاروں وائرس بنا لیتا ہے۔ ڈاکٹر سعید اور ان کی ٹیم نے دیکھا کہ وائرس کو اپنی کاپی بنانے کے لیے اہم پروٹین کی ضرورت ہوتی ہے۔ جب یہ وائرل پروٹین بنتے ہیں تو کپڑے کے تھان کی طرح لمبے طرز کے ہوتے ہیں جن کو کٹائی کے بغیر استعمال نہین کیا جا سکتا۔ یہ بالکل ایسے ہی ہے جیسےہم اپنے ناپ کے مطابق کپڑا کٹواتے ہیں، ورنہ وہ ہمارے کسی کام کا نہیں ہوتا ۔ اس مثال میں جو کام درزی کی قینچی کرتی ہے وہ وائرس کا ایک اہم کیمیائی خامرہ کرتا ہے جسے مین پروٹیز کہتے ہیں۔ ڈاکٹر سعید کی تحقیق کے مطابق اگر اس مین پروٹیز کو روک دیا جائے تو کورونا وائرس ہر خلیے میں گھس کر اپنے جیسے مزید لاکھوں وائرس نہیں بنا سکے گا۔
 

  ڈاکٹر سعیداور ان کی ٹیم نے کورونا کی قینچی کو مفلوج کرنے والا  ایک اہم کیمیائی عنصر ٹی-ایف-۹  کے نام سے دریافت کیا ہے جو کورونا وائرس کے مین پروٹییز کے ساتھ جڑ  کر  اسے بے اثر کرنے کی صلاحیت رکھتا ھے۔ ڈاکٹر سعید کا کہنا ہے کہ بد قسمتی سے پاکستان میں اس طرح کی تحقیق کرنے کے لیے تعلیمی اداروں کا بنیادی ڈھانچا کمزور ہے جس کی وجہ سےادویات کے شعبے میں  ہمارے  تحقیقی مقالوں کا معیار بہت سطحی ہوتا ہے اور عالمی  برادری میں ہمارے  تحقیقی نتائج کو خاطر خواہ پزیرائی  نہیں ملتی۔ ڈاکٹر صاحب نے  مزیدبتایا کہ ان چیلنجز کے باوجود لمز میں تحقیق کے لیے معاون ماحول موجود ہے جس سے تحقیقی عمل میں نہ صرف آسانی پیدا ہوتی ہے بلکہ اس کا معیار بہتر کرنے میں بھی مدد ملتی ہے۔ ڈاکٹر سعید نے یہ تحقیق اپنی پی-ایچ-ڈی طالبہ فروا بتول کی مدد سے مکمل کی۔ اس تحقیق کو مزید آگے بڑھانے کے لیےبین القوامی اداروں کے  ساتھ اشتراک بھی حاصل کیا جا رہا ہے۔ ڈاکٹر سعید کا کام مندرجہ ذیل تحقیقی جریدے میں شائع ہونے پر ہم ان کو مبارک باد پیش کرتے ہیں۔