کیا آپ کسی ایسے کیمیائی مادے کو جانتے ہیں جو گھریلو ٹوٹکوں سے لے کر سائنسی تجربہ گاہ تک میں استعمال ہوتا ہو؟ قدرت کے اِس کارآمد کیمیائی نگینے کو سکسینک ایسڈ کے نام سے جانا جاتا ہے۔ یہ ایک ایسا سفید قلمی نامیاتی تیزاب ہے جسے اکثر اشیائے خوردونوش کی تیاری اور دواسازی میں بھی استعمال کیا جاتا ہے۔ صنعتی سطح پر سکسینک ایسڈ کو کیمیائی طور طریقوں سے تو بنایا جا ہی رہا ہے مگر  پیداوار کا یہ روایتی طریقہ مہنگے خام مال اور ماحول دشمن نتائج کی وجہ سے زیادہ کارگزار نہیں۔ کیا ہی اچھا ہو کہ اِس اہم کیمیائی مرکب کی  پیداوار کا ذمہ حیاتیاتی طرزِعمل کو سونپ دیا جائے! شعبۂ کیمیا اور کیمیائی انجنئیرنگ کے ڈاکٹر روفس ڈِکسن کی تحقیق اسی مرکزی خیال کو عملی جامہ پہنانے کی ایک با معنی کوشش ہے۔

ڈاکٹر ڈِکسن کا تحقیقی مقالہ حال ہی میں ایک نامور سائنسی جریدے Energy and Environmental Science میں شائع ہوا ہے۔ اِن کی تحقیق میں سکسینک ایسڈ کو سستے، موثر اور ماحول دوست طریقوں سے بنانے کی تجویز دی گئی۔ دراصل ڈاکٹر ڈِکسن کی تحقیق ۵ اہم سوالات کے جواب تلاش کرتی ہے:

     ۱۔ سکسینک ایسڈ کی پیداوار میں کون سا خام مال استعمال ہونا چاہیے؟

     ۲- پیداوار کو مزید سستا کرنے کے لیے کون کون سی فنیات و صنعتیاتی ترکیبیں استعمال کی جا سکتی ہیں؟

     ۳- پیداوار سے جڑے معاشی اور ماحولیاتی اثرات کیا ہوں گے؟

     ۴- اس پورے عمل کو سرمایہ کار کے لیے معاشی طور پر پُرکشش کرنے میں کونسے عناصر اہمیت کے حامِل ہیں؟

     ۵- سکسینک ایسڈ کی پیداوار میں کون سے معاشی مسائل قابلِ نظر ہیں؟

ان سوالات کو سلجھانے کے لیے ایک ایسی سیمولیشن تیّار کی گئی ہے جِس میں صرف ایسے خاکوں پر نظرثانی کی گئی جو معاشی طور پر استحکام فراہم کر سکیں۔ “مونٹیکارلو” قِسم کی سیمولیشن کے ذریعے ہر ممکن حل کے جوکھم کا تخمینہ بھی لگایا گیا۔ ایک پیچیدہ ریاضیاتی ماڈل کے ذریعے ۸۵ ہزار سے زائد متغیر عناصر اور ۳۵ ہزار سے زائد پابندیاں لگائی گئیں، گویا سکسینک ایسڈ کی حیاتیاتی طرزِعمل کے ذریعے پیداوار کو مختلف زاویوں سے مستحکم اور قابلِ عمل بنانے کی کوشش کی گئی۔ معلوم ہوا کہ سکسینک ایسڈ کو بڑے پیمانے پر بنانے کے لیے گلیسرول سے اخذ کردہ طریقہ سب سے موثر ہے، جس کی سالانہ لاگت ۱۳.۵ کروڑ ڈالر ہوگی۔

کسی بھی سرمایہ کار کے لیے نقصان سے بچاؤ اُس کی پہلی ترجیح ہوتی ہے۔ چنانچہ اِس پوری کاوِش کو صنعتی اعتبار سے کارآمد بنانا ڈاکٹر ڈِکسن کی بھی اوّلین ترجیح رہی ہے تاکہ سکسینک ایسڈ کی بڑے پیمانے پر تیاری کو حقیقی جامہ پہنایا جا سکے اور اِس اہم کیمیائی مرکب کی ماحول دوست اور معاش دوست پیداوار کو یقینی بنایا جا سکے۔ ہم ڈاکٹر ڈِکسن کی اِس قابلِ ستائش کوشش پر اِن کو مبارک باد پیش کرتے ہیں اور امید کرتے ہیں کہ ان کو مستقبِل میں بھی ایسی کامیابیاں ملتی رہیں۔

حوالہ:

Sustainable Bio-Succinic Acid Production: Superstructure Optimization, Techno-Economic, and Lifecycle Assessment Energy & Environmental Science, Apr. 2021 doi:10.1039/D0EE03545ADickson, Rofice

 کسی بھی زبان کی شاہراہِ ترقی کا ایک سنگِ نشان یہ بھی ہوتا ہے کہ اُس زبان میں مختلف انواع کے مضامین اور موضوعات کس قدر اور کس طرح ادا کیے جا سکتے ہیں؟ اردو زبان کے بارے میں عام طور پر خیال کیا جاتا ہے کہ سماجی اور عمرانی علوم سے متعلق مباحث تو اِس زبان میں کسی قدر سہولت سے ادا کیے جا سکتے ہیں مگر یہ زبان جدید سائنسی مباحث، بڑی حد تک بیان کرنے سے قاصر ہے۔

یہ رائے عام طور پر زیادہ تر عمومی ناواقفیت اور چند غلط فہمیوں کی زائدہ ہے۔ یہ بیّن حقیقت ہے کہ اردو زبان میں متفرق سائنسی موضوعات کو بیان کرنے کی خاطر متعدد کوششیں اٹھارھویں صدی کی تیسری دہائی ہی میں شروع ہو گئی تھیں۔ مثلاً حیدر آباد دکن میں ۱۸۳۴ء میں نواب شمس الامراء کی سرپرستی میں ایک ’دارالترجمہ‘ کی بنیاد رکھی گئی، جہاں ریاضی، طبیعات، کیمیا، علم الادویہ، جیومیٹری، فلکیات اور دیگر علوم پر مختلف کتب یورپی زبانوں سے اردو میں ترجمہ کی جاتی تھیں۔ اسی دور میں لکھنؤ میں اودھ کے بادشاہ نصیر الدین حیدر کی سرپرستی میں سائنسی علوم سے متعلق چند کتب انگریزی سے اردو میں منتقل ہو رہی تھیں۔

The History of Rasselas: Prince of Abissinia 
سیموئل جانسن کا ایک معروف انگریزی ناول، جس کو اردو میں ’تواریخ راسلس‘ کے عنوان سے منتقل کرنے والے کمال الدین حیدر عرف محمد میر لکھنوی کا نام اس حوالے سے قابل ذکر ہے کہ انھوں نے اس دور میں سائنسی موضوعات پر تقریباً اٹھارہ کتب کو اردو میں منتقل کیا ۔ ۱۸۲۵ء میں قائم ہونے والے دہلی کالج اور اسی کالج میں ۱۸۴۳ء میں قائم ہونے والی دہلی ٹرانسلیشن سوسائٹی کی خدمات بھی اس حوالے سے بہت نمایاں ہیں۔ کالج اور سوسائٹی کے زیر اہتمام متنوع علوم پر تقریباً سوا سو کتب ترجمہ کی گئیں، جن میں نمایاں تعداد سائنسی کتب کی تھی۔ سوسائٹی کے کارپرداز اس حوالے سے خاصے روشن خیال ثابت ہوئے کہ اس زمانے میں انھوں نے اردو میں ترجمے کے جو اصول وضع کیے تھے، بڑی حد تک آج بھی غیر متعلق نہیں ہوئے ہیں۔

انیسویں صدی ایسے ہی اداروں اور کاوشوں میں ایک نام تھامسن سِوَل انجینئرنگ کالج، رڑکی (پہلا نام: سول انجینئرنگ کالج) کا بھی ہے۔ رڑکی، سہارن پور اور ہردوار کے قریب ایک قصبہ ہے، جو اُس وقت شمال مغربی صوبے یا اتر پردیش کا حصہ تھا۔ آج کل رڑکی شہر، ریاست اتراکھنڈ کا حصہ ہے۔ اس کالج کا امتیاز یہ تھا کہ ۱۸۴۷ء میں اس کے قیام سے لے کر تقریباً ۱۸۷۰ء تک، ہندوستانی باشندوں کو سول انجینئرنگ کی جملہ تعلیم اردو زبان میں دی جاتی رہی۔

یہاں اس کالج کے قیام کا مختصر پس منظر بتانا ضروری معلوم ہوتا ہے۔ دوسری اینگلو مراٹھا جنگ (۱۸۰۵ء تا ۱۸۰۳ء)  سے لے کر دوسری جنگ پنجاب (۱۷۴۹ء) کے خاتمے پر انگریز، شمال مغربی صوبہ جات (اُتر پردیش)، صوبہ جاتِ وسطی (مدھیہ پردیش)، بہار، مہاراشٹر، گجرات، راجستھان، سندھ، بلوچستان، شمال مغربی سرحدی صوبے (خیبر پختونخواہ) پر بلاواسطہ یا بالواسطہ متصرف ہو چکے تھے۔ ان علاقوں پر سیاسی لحاظ سے غلبہ برقرار رکھنے کے لیے ضروری تھا کہ یہاں کے قدرتی وسائل (مثلاً دریاؤں، زرخیز زمینوں، زرعی پیداوار وغیرہ) سے حتی المقدور فائدہ اٹھایا جائے۔ دوم یہ کہ یہاں پہ عمومی ترقیاتی کاموں کا جال سا بچھایا جائے۔ مثلاً پہلے سے موجود سڑکوں کو ترقی دی جائے، نئی سڑکیں اور راستے بنائے جائیں، ریلوے ٹریک بچھائے جائیں، تار (ٹیلیگراف) کا نظام قائم کیا جائے وغیرہ وغیرہ۔ اس حکمتِ عملی کا انھیں دوہرا فائدہ یہ ہونا تھا کہ جہاں یہ کام ہندوستانی باشندوں کی نظر میں ان کی قدر بڑھاتے وہیں ان سب علاقوں میں انگریز سپاہ کی بآسانی نقل و حمل اور دور دراز کے علاقوں تک ان کی رسائی کو ممکن بناتے۔ یوں انگریزی اقتدار کی قوتِ نافذہ میں اضافہ ہوتا۔ ان مشکل اور طویل مدتی منصوبوں کے لیے ماہر سول انجینئرز اور ان کے معاونین کی ضرورت تھی جو اس نوعیت کے کاموں کو تکمیل تک پہنچا سکیں۔ 

یوں تو اس زمانے میں شمال مغربی صوبے (اتر پردیش) میں انگریزوں کے زیرِ انتظام تین کالج (دہلی کالج، آگرہ کالج، بنارس کالج) قائم ہو چکے تھے اور ۹ اینگلو ورنیکولر اسکول بھی خدمات انجام دے رہے تھے، مگر فنّی اور تکنیکی تعلیم کے لیےمخصوص ادارہ کوئی نہیں تھا۔ لہٰذا کمپنی کے مقبوضات میں عام طور پر اور خاص کر شمال مغربی صوبے میں جاری عمومی ترقیاتی کاموں کے لیے اہلکار کو مہیا کرنے کے لیے ۲۵ نومبر ۱۸۴۷ء کو سول انجینئرنگ کالج، رڑکی کا قیام عمل میں لایا گیا۔ ابتدا میں کالج کا نام کالج آف سول انجینئرنگ رکھا گیا اور لیفٹیننت آر۔میکلیگن کو کالج کا پرنسپل مقرر کیا گیا۔ ۱۸۵۴ء میں کالج کا نام تبدیل کر کے تھامسن انجینئرنگ کالج، رڑکی رکھ دیا گیا۔ آغاز میں طلبہ کے تین زمرے قائم کیے گئے، دو  زمرے یورپی کمیشنڈ اور نان کمیشنڈ افسروں کے لیے جبکہ تیسرا زمرہ مقامی ہندوستانی طلبہ کے لیے مخصوص کیا گیا۔ کالج کے قیام سے لے کر کم از کم ۱۸۷۰ء تک ہندوستانی طلبہ کے لیے ذریعہ تعلیم کے لیے اردو زبان کو اختیار کیا گیا۔ کالج کی مساعی سے قبل سول انجینئرنگ کے موضوعات پہ اردو میں کوئی کام نہیں ملتا تھا۔ اگرچہ ریاضیات، ہیئت، فلکیات، جغرافیہ، جبر  و مقابلہ، مساحت وغیرہ پہ کچھ نہ کچھ مواد ہم دست تھا لیکن سول انجینئرنگ سے متعلقہ موضوعات اردو میں منتقل نہیں ہوئے تھے۔ لہٰذا کالج انتظامیہ نے اس حوالے سے بنیادی نوعیت کے مضامین پر کتب ترجمہ کروانی شروع کیں۔ 
اس سلسلے کا آغاز ۱۸۵۰ء سے قبل ہی ہو گیا تھا۔ ۱۸۵۰ء کے بعد سے تسلسل سے مطبوعات سامنے آنا شروع ہو گئیں۔ زیادہ کتب تو اردو میں ہی شائع ہوئیں لیکن چند کتب ناگری حروف میں بھی شائع ہوئیں۔ اس زمانے کی چند دستیاب کتب بکھری ہوئی حالت میں برصغیر کے مختلف کتب خانوں میں موجود ہیں۔  

راقم کی تلاش و تحقیق کے نتیجے میں پہلی مرتبہ رڑکی کالج سے شائع ہونے والی چونتیس (۳۱ اردو اور ۳ ناگری حروف میں) کتب کی فہرست تیار کی گئی ہے۔ ذیل میں ایک جدول ترتیب دیا گیا ہے جس کے ذریعے کتب کے نام، ان کے مصنفین و مترجمین، سنہ اشاعت اور تعداد صفحات، جیسی معلومات درج کی جا رہی ہیں۔ جہاں کچھ معلومات میسر نہیں آ سکیں وہاں --- کا نشان لگا دیا گیا ہے۔ یہ فہرست چونکہ اب تک کے تحقیقی کاموں میں پہلی مرتبہ مرتب کی گئی ہے، اس لیے اس میں مزید بہتری کی گنجائش یقیناً باقی ہے۔  
 
کالج کی دستیاب تصانیف و تالیفات کے جائزے سے یہ بات واضح ہوتی ہے کہ کالج کے نمایاں مصنفین و موَلفین میں رائے منّو لال (فرسٹ نیٹو ماسٹر بعد ازاں ہیڈ نیٹو ماسٹر)، لالہ بہاری لال (فرسٹ نیٹو ماسٹر،بعد ازاں ہیڈ نیٹو ماسٹر)، کنہیا لال (سب اسسٹنٹ سول انجینئر)، شنبھو داس (اسسٹنٹ نیٹو ماسٹر، نیٹو سروینگ ماسٹر)، شیخ بیچا (اسسٹنٹ نیٹو ماسٹر، سیکنڈ نیٹو ماسٹر)، موہن لال اور جگ موہن لال شامل تھے۔ 

عموماً کالج سے چھپنے والے رسائل کے سرِ ورق کی عبارت یوں ہوتی تھی:

رسالے 

جو کہ واسطے طلبائے مدرسہ رڑکی کے تیار 

کیے گئے ہیں 

رسالہ نمبر دوم 

در باب مضبوطی اشیائے سامان عمارت کے 

ترجمہ کیا ہوا منو لعل 

اول نیٹو ماسٹر مدرسہ رڑکی کا سنہ ۱۸۵۱ء 

کالج کی تاسیس کے وقت سے تقریباً ایک چوتھائی صدی تک مقامی ہندوستانیوں کو اردو زبان میں ہی تعلیم دی جاتی رہی۔ اس مقصد کے لیے ان موضوعات سے متعلق زیادہ تر انگریزی کتب کو اردو میں منتقل کیا گیا۔ افادی پہلو کو مد نظر رکھتے ہوئے کالج کے نصاب میں شامل کتب ہی اس کام کے لیے منتخب کی گئیں۔ 

یہ نکتہ بھی قابلِ توجہ ہے کہ کالج میں ہندوستانی طلبہ کی تدریس کے لیے ذریعہَ تعلیم، اردو زبان کو منتخب کیا گیا۔ کالج کیلنڈر ۱۸۷۱ سے ۱۸۷۲ء میں کالج کے ہندوستانی طلبہ کی فہرستوں پر نظر ڈالنے سے باآسانی اندازہ ہو جاتا ہے کہ کالج میں مسلمان اور ہندو طلبہ کی شرح تقریباً یکساں تھی۔ ہندو طلبہ میں سے بیشتر کا تعلق اتر پردیش سے ہی تھا، اس کے باوجود یہ کالج اردو ہندی تنازعہ سے دور تھا۔ اسی باعث کالج کی بیشتر تالیفات اردو رسم الخط میں جبکہ محض چند ایک کتب ناگری رسم الخط میں شائع ہوئیں۔ اس سے یہ بھی معلوم ہوتا ہے کہ انیسویں صدی کی تیسری چوتھائی تک بھی شمالی ہندوستان میں اردو زبان اور رسم الخط کو بیشتر طبقات میں، مذہبی و ثقافتی بُعد سے قطعِ نظر، قبولِ عام حاصل تھا۔ 

ایک سوال یہ پیدا ہوتا ہے کہ کالج میں ہونے والا تالیفی کام اتنے محدود پیمانے پر کیوں تھا؟ تو یہ بات خاطر نشان رہے کہ تھامسن سول انجینئرنگ کالج، رُڑکی کے قیام کا اصل مقصد سول انجینئرنگ کی تعلیم دینا تھا۔ کالج کے منتظمین کی توجہ صرف اس بات پر تھی کہ تدریسی امور سے متعلق کچھ مواد مقامی طلبہ کے لیے تیار کروایا جا سکے۔ اس مقصد کے حصول کے لیے انھوں نے کالج کے مقامی تدریسی عملے میں سے ہی چند اساتذہ کو منتخب کیا ۔ ان اساتذہ نے نصاب سے متعلق چند ضروری کتب کو اردو میں ترجمہ و تالیف کیا۔ اس کوشش میں ان اساتذہ کی ذاتی لیاقت ہی کام آئی۔ ان کی رہنمائی کرنے کو کوئی باقاعدہ ادارہ بھی نہ تھا اور نہ ہی کوئی سرپرست تھا۔اسی باعث کالج میں ہونے والے تصنیفی و تالیفی کام کی تنگ دامانی کھٹکتی ہے مگر اس کے باوجود کالج کے اساتذہ کا یہ امتیاز ہے کہ انھوں نے مقدور بھر کام کے ذریعے ایک نئے چلن کی بنیاد رکھی۔ 

کالج میں ہونے والے تالیفی کام میں موضوعات کے ساتھ ساتھ ان کی پیشکش میں بھی خاصا تنوع پایا جاتا ہے۔ گو موضوعات زیادہ تر سول انجینئرنگ سے ہی متعلق ہیں مگر اکثر ریاضی اور جغرافیہ کے موضوعات سے بھی اعتنا کیا گیا ہے۔ اپنے موضوعات کے تناظر میں کالج کی کتب میں زیادہ تر عملی مشقوں سے متعلق مباحث ہوتے تھے۔ اسی طرح عملی نوعیت کے سوالات اور ان کے حل ہوتے تھے۔ کالج کی تالیفات کے معتدبہ حصوں میں عملی نوعیت کے سوالات اور مشقیں دیکھی جا سکتی ہیں۔ شکلوں اور تصاویر کے ذریعے موضوع کی وضاحت کی جاتی تھی۔ ان کتب کی نثر بھی اکثر و بیشتر صاف تھی اور اس میں اتنی صلاحیت تھی کہ وہ تکنیکی و فنی موضوعات کو بغیر کسی اشکال کے منطقی طور پر پڑھنے والے تک پہنچا سکے۔  

رڑکی کالج میں اردو زبان میں سول انجینئرنگ کے مضامین بیان کرنے کی اس ابتدائی کاوش کے بعد ایک طویل عرصے تک ہمیں اور کوئی کاوش نظر نہیں آتی۔ ۱۹۱۷ء میں جامعہ عثمانیہ اور پھر دارالترجمہ کے قیام نے پھر اس چراغ کو روشن کیا۔ اس ضمن میں یہ امر قابل توجہ ہے کہ منتشر اور وقفے وقفے سے ہونے والی ان کاوشوں کی افادیت کے باوجود مستقل انگریزی ذریعہ تعلیم نے یہ خیال عام کر دیا کہ اردو زبان سائنسی و تکنیکی مضامین بیان کرنے سے بیشتر معذور ہے۔ 

اردو میں تھامسن انجینئرنگ کالج، رڑکی کے اساتذہ، مترجمین و مؤلفین کی یاد نگاری  نہ ہونے کے برابر ہے۔ یہ بات ضرور نشانِ خاطر رہے کہ یہی لوگ تھے جنھوں نے اردو میں خالص فنی و تکنیکی موضوعات بیان کرنے کی داغ بیل ڈالی۔ انگریزی کتب کو ترجمہ کیا، ان کے موضوعات میں مقامی حالات کے تحت اضافے بھی کیے۔ تراجم و تالیفات میں قابلِ ذکر تنوع ہونے کے باوجود اندازِ نثر کی اِکسانیت قائم کرنے میں کافی کامیاب رہے۔ اس اندازِ نثر میں اتنی صلاحیت تھی کہ معمولی خواندہ شخص بھی بغیر کسی اشکال کے زیرِ بحث موضوع کی تفہیم میں آسانی محسوس کرتا تھا۔ تیزی سے کروٹیں لیتے وقت کی زد میں، یہ فاضلین بے شک گم نام سہی مگر ان کے کام کی افادیت اور اہمیت بہرحال مسلّم ہے۔ 

 

شدید گرمی اور حبس کے موسم میں باہر نکل کر کام کرنے کا دل چاہتا ہے؟ نہیں؟ آکسائڈ آئنز (oxide ions) کا بھی نہیں!
لیکن انسان اور آکسائڈ آئنز  میں ایک بنیادی فرق ہے: جب ہم زیادہ چلتے ہیں تو تھک جاتے ہیں، جبکہ آکسائڈ آئنز  حرکت میں آئیں تو بجلی بنا سکتے ہیں!!!   

جی ہاں! سائنسدانوں نےآکسائڈ آئنز کی “چہل قدمی” کے لیے بہتر ماحول پیدا کر کے بجلی بنانے کا ایک ایسا طریقہ دریافت کیا جس میں صرف ہائیڈروجن، ہوا اور آکسائڈ آئنز  کی روانی درکار ہے۔اس دریافت میں solid oxide fuel cells (SOFCs) کا مرکزی کردار ہے۔

یہ سارا عمل تین آسان اورمختصر نکات میں بھی بتایا جا سکتا ہے:
۱۔ ایک طرف ہائیڈروجن گیس کو توڑ کر ہائیڈروجن آئنز (H+) بنائیں۔
۲- دوسری طرف آکسیجن گیس کو توڑ کر آکسائڈ آئنز (O-2) بنائیں۔
۳- ان دونوں کو ایک دوسرے سے ملا کر بجلی حاصل کریں۔ 

اس سارےعمل کو بروئے کار لانے میں ایک بڑا چیلنج درپیش ہے۔ دراصل SOFCs سے بجلی بنانے کے عمل میں آکسائڈ آئنز کو ایک ٹھوس برق پاش (electrolyte) سے گزر کر ہائیڈروجن آئنز سے ملنا ہوتا ہے۔ روایتی طور پر اس برق پاش کو ۷۰۰ سینٹی گریڈ کے درجہ حرارت پر رکھا جاتا ہے تاکہ آکسائڈ آئنز کے لیے اس کی ایصالیت برقرار رہے۔ لیکن اتنے زیادہ درجہ حرارت کو طویل مدت کے لیے برقرار رکھنا SOFCs کے استعمال کو مشکل بنا دیتا ہے۔ اس مسئلے کو سلجھانے کے لیے ایک نئے قسم کے برق پاش پر تحقیق کی گئی جس میں آکسائڈ آئنز کی ایصالیت کم درجہ حرارت (۶۰۰ سینٹی گریڈ) پر بھی برقرار رکھی جا سکتی ہے۔ 

پیرووسکائیٹ (perovskite) سے اخذ کردہ کرسٹل (Ba3VWO8.5) کی برقی صلاحیتوں کا جائزہ لیا گیا اور معلوم ہوا کہ اس مٹیریل کو SOFCs میں بطور برق پاش استعمال کر کے مطلوبہ نتائج حاصل کیے جا سکتے ہیں۔ اس کرسٹل میں پائے جانے والی آکسیجن کی بے ترتیبی اس کی ایصالیت بڑھانے میں اہم کردار ادا کرتی ہے۔

اس تحقیق کی قیادت ڈاکٹر فلک شیر نے کی اور ان کی پی-ایچ-ڈی شاگرد اسماء گیلانی شریک مصنف ہیں۔ یہ تحقیق Journal of Materials Chemistry A میں شائع کی گئی۔
حوالہ:

J. Mater. Chem. A, 2020, 8, 16506-16514 (DOI: 10.1039/D0TA05581F)
 

 

کورونا وائرس کی عالمی وباء نے جہاں انسانی ترقی کا امتحان لیا ہے وہاں ہماری خودارادیت کو بھی جھنجھوڑا ہے۔ ۲۰۲۰ شاید کورونا کا سال تھا مگر ۲۰۲۱ اس وباء کے خاتمے کا سال ہو گا۔ دنیا بھر کے بہت سے سائنسدان اس وائرس کے طریق واردات کو سمجھ کر اس کو مفلوج بنانے کی کوشش میں مصروف ہیں۔ لمز میں ڈاکٹر محمد سعید اور ان کی ٹیم، جن کا تعلق شعبہ کیمیا و کیمیائی انجنئیرنگ سے ہے، اسی عالمی کوشش کا حصہ ہیں۔ حال ہی میں ان کی تحقیق سے جڑی ایک اہم پیش رفت ہوئی جس سے یقیناً کورونا وائرس کو شکست دینے میں پیش رفت ہوگی۔ کورونا کی قینچی! جی ہاں۔ کورونا وائرس جب بھی کسی خلیے میں داخل ہوتا ہے تو اس کی پوری مشینری کو اپنے تابع کر لیتا ہے جس سے لاکھوں خلیے وائرس کی فوٹو کاپی مشینیں بن جاتی ہیں۔ اس طرح ایک کورونا وائرس نہایت چالاکی سے اپنے جیسے ہزاروں وائرس بنا لیتا ہے۔ ڈاکٹر سعید اور ان کی ٹیم نے دیکھا کہ وائرس کو اپنی کاپی بنانے کے لیے اہم پروٹین کی ضرورت ہوتی ہے۔ جب یہ وائرل پروٹین بنتے ہیں تو کپڑے کے تھان کی طرح لمبے طرز کے ہوتے ہیں جن کو کٹائی کے بغیر استعمال نہین کیا جا سکتا۔ یہ بالکل ایسے ہی ہے جیسےہم اپنے ناپ کے مطابق کپڑا کٹواتے ہیں، ورنہ وہ ہمارے کسی کام کا نہیں ہوتا ۔ اس مثال میں جو کام درزی کی قینچی کرتی ہے وہ وائرس کا ایک اہم کیمیائی خامرہ کرتا ہے جسے مین پروٹیز کہتے ہیں۔ ڈاکٹر سعید کی تحقیق کے مطابق اگر اس مین پروٹیز کو روک دیا جائے تو کورونا وائرس ہر خلیے میں گھس کر اپنے جیسے مزید لاکھوں وائرس نہیں بنا سکے گا۔
 

  ڈاکٹر سعیداور ان کی ٹیم نے کورونا کی قینچی کو مفلوج کرنے والا  ایک اہم کیمیائی عنصر ٹی-ایف-۹  کے نام سے دریافت کیا ہے جو کورونا وائرس کے مین پروٹییز کے ساتھ جڑ  کر  اسے بے اثر کرنے کی صلاحیت رکھتا ھے۔ ڈاکٹر سعید کا کہنا ہے کہ بد قسمتی سے پاکستان میں اس طرح کی تحقیق کرنے کے لیے تعلیمی اداروں کا بنیادی ڈھانچا کمزور ہے جس کی وجہ سےادویات کے شعبے میں  ہمارے  تحقیقی مقالوں کا معیار بہت سطحی ہوتا ہے اور عالمی  برادری میں ہمارے  تحقیقی نتائج کو خاطر خواہ پزیرائی  نہیں ملتی۔ ڈاکٹر صاحب نے  مزیدبتایا کہ ان چیلنجز کے باوجود لمز میں تحقیق کے لیے معاون ماحول موجود ہے جس سے تحقیقی عمل میں نہ صرف آسانی پیدا ہوتی ہے بلکہ اس کا معیار بہتر کرنے میں بھی مدد ملتی ہے۔ ڈاکٹر سعید نے یہ تحقیق اپنی پی-ایچ-ڈی طالبہ فروا بتول کی مدد سے مکمل کی۔ اس تحقیق کو مزید آگے بڑھانے کے لیےبین القوامی اداروں کے  ساتھ اشتراک بھی حاصل کیا جا رہا ہے۔ ڈاکٹر سعید کا کام مندرجہ ذیل تحقیقی جریدے میں شائع ہونے پر ہم ان کو مبارک باد پیش کرتے ہیں۔ 

 

پیدا ہونے سے لے کر زندگی کے اختتام تک کے اس لازمان سلسلے میں انسان کچھ برس کا سفر زمین کے سر سبز میدان، آسمان سے باتیں کرتے پہاڑوں اور تپتے ریگستانوں کے دامن میں گزارتا ہے اور سوچتا ہے کہ کیا اسکی زندگی کا کوئی مقصد ہے بھی یا نہیں۔ ہم میں سے اکثر لوگ کسی ایسے انسان کو ضرور جانتے ہوں گے جو اس مقصد کی تلاش میں اپنے گھر، دوست اور رشتہ داروں سے دور جا کر علم سے دوستی کے سفر کا آغاز کرنا چاہتا ہو یا کر چکا ہو۔

آئیے ملتے ہیں ایک ایسے ہی شخص سے، جس کا آبائی شہر تو لکی مروت ہے مگر علم کی طلب اسے پشاور، اسلام آباد اور لاہور لے چلی اور آج وہ شخص اپنے آبائی علاقے کا پہلا پی-ایچ-ڈی اسکالر بن چکا ہے۔ یہ ہے ڈاکٹر اختر منیر۔

دراصل ڈاکٹر اختر کا کیمیا سے عشق ایف ایس سی مکمل ہونے کےفوراً بعد ہی شروع ہو گیا تھا۔ انھیں لگا کہ قدرت کی جانب سے ان کے لیے فیصلہ ہو چکا ہے کہ وہ کیمسٹری کو بطور مضمون اپنائیں گے۔ لہٰذا ، انہوں نے لمز میں اپنے سفر کو شروع کرنے سے قبل قائداعظم یونیورسٹی سےغیر نامیاتی اور تجزیاتی  کیمسٹری میں ایم ایس سی اور ایم فل  کی ڈگری حاصل کی۔

لیکن مفت میں مشورہ کون نہیں دیتا؟ یہ کتنی عام سی بات ہے کہ آپ اپنے کیریئر سے متعلقہ کوئی بھی قدم اٹھانے کا سوچیں تو کبھی دائیں کبھی بائیں سے آواز آتی ہے “ارے ایسے کرلو، ارے ویسے کر لو!”۔ قائد اعظم یونیورسٹی سے ایم ایس سی کے بعد بہت سے لوگوں نے ڈاکٹر اختر کو بھی کچھ ایسے ہی کہا؛ “لمز کیوں جانا چاہتے ہو؟ باہر کی یونیورسٹی جانا بہتر ہوگا، اچھا چلو قائد اعظم یونیورسٹی ہی چلے جاؤ”۔ لیکن ڈاکٹر اختر نے صرف اپنے دل کی سنی اور لمز میں پی-ایچ-ڈی میں داخلہ لیا۔ ڈاکٹر صاحب کے مطابق یہ ان کی تعلیمی اور پیشہ ورانہ زندگی کا سب سے اچھا فیصلہ تھا۔

دنیاوی مقصد تو انسان کو خود ہی بنانا پڑتا ہے۔ تو کیوں نہ ایسا مقصد بنا لیا جائے جس کی کاوش کے نتائج نہ صرف ذاتی بلکہ عوامی اور ملکی سطح پر بھی مرتب ہوں! ڈاکٹر اختر نے یہاں بھی ایک اچھا فیصلہ کیا اور انسانی فلاح و بہبود کو مدنظر رکھتے ہوے پانی سے توانائی حاصل کرنے کا ایک انوکھا اور موثرطریقہ ایجاد کیا جس کے نتیجےمیں بننے والی ہائڈروجن گیس کو بطور ایندھن استعمال کیا جا سکے گا۔ ڈاکٹر اختر نے بتایا کہ اس تجربے میں پانی سے ہائڈروجن الگ کرنے کے لیے انہوں نے کوبالٹ اور نیکل جیسی دھاتوں سمیت گرافین آکسائڈ  (graphene oxide)   اور انتہائی چھوٹے سوراخوں پر مبنی کاربن  (mesoporous carbon)   بھی استعمال کی۔ اس طرح انھوں نے ایک نئی قسم کے نینو عمل انگیز  (nano-catalyst)   کی دریافت کی جس سے روایتی طریقہ کار کی نسبت کئی گنا زیادہ ہایڈروجن گیس بنائی جا سکتی ہے۔

یہ مٹیریل انسانی آنکھ براہِ راست دیکھ تو نہیں سکتی لیکن عقل کا سہارا لے کرانسان آسمان و زمیں کی حدیں چھو سکتا ہے اور خود بھی اپنی قابلیت پر حیران ہو جاتا ہے۔ 

ڈاکٹر اختر کا ماننا ہے کہ آج کل کے دور میں نینو ٹیکنالوجی پر زیادہ کام صحت اور توانائی کے شعبے میں ہو رہا ہے۔ یہ دونوں ہی انسان کی سب سے بڑی اور نمایاں ضروریات زندگی بن چکےہیں۔ ٹرک، گاڑی اور ہوائی جہاز، یہ سب پٹرولیم مصنوعات کو جلا کر چلائے جاتے ہیں اور اس کے نتیجے میں خارج ہونے والا خطرناک اور مضر صحت فضلہ ہوا میں بکھر جاتا ہے۔ کیا ہم اپنے بچوں کے لیے آلودگی سے بھری دنیا چھوڑ کر جانا چاہتے ہیں؟ کیا ہم اس نظام میں کوئی تبدیلی نہیں لانا چاہتے؟ کیا اس آلودہ ماحول سے نکلنے کی لیے کوئی تیار نہیں؟ آلودگی سے نجات حاصل کرنے کے لیے ہمیں ہایڈروجن گیس جیسے قابل تجدید توانائی   (renewable energy)  کے وسائل تلاش کرنے ہوں گے، جو کہ ڈاکٹر اختر کی تحقیق کا مرکزی مضمون ہے۔

شاید ڈاکٹر اختر کے آبائی علاقے کی کم حالی اور پسماندگی ہی انکی کامیابی کی وجہ بنی کیونکہ انھوں نے کبھی اپنے حوصلے پست نہ ہونے دیے اور یہی وجہ ہے کہ آج ان کا نام انکے علاقے کے لوگوں کے لیے باعثِ فخر ہے۔

انسان اس کرّہ ارض پہ چند دیہائیوں کے لیے قدم رکھتا ہے۔ اس مختصر وقت میں اپنا مقصد کھوجنا، اس پر محنت سے کام کرنا اور کامیابیاں سمیٹنا ، یہ شرف حاصل کرنا ہر ایک کے بس میں ہے۔ ڈاکٹر صاحب کے مطابق انہیں یہ کامیابی والدین کی دعا کے بعد لمز کی وجہ سے ملی جہاں انھیں ملے ہم خیال ساتھی، مخلص دوست اور بہترین اساتذہ بالخصوص وہ اپنے تعلیمی مربی ڈاکٹر ارشاد حسین کے تہِ دِل سے ممنون ہیں۔ ان کا کہنا ہے کہ حقیقی طور پر لمز طلبہ میں میرٹ اور خوش آئند مسابقت کو فروغ دیتا ہے اور پھر طَلَبہ میں استقامت ، دیانتداری اور تندہی کا مزاج بھی پیدا کرتا ہے۔ چنانچہ اس زمانہ طالب علمی کے دوران ان کی شخصیت کی خوبصورت تشکیل ہوئی۔ انہوں نے خاص طور پرادارے  کے ڈین ڈاکٹر صبیح انور کے انقلابی اقدامات کی تعریف کی۔