جب آپ فزلیب یعنی فزکس لیب کی تجربہ گاہ کی ورک شاپ میں داخل ہوتےہیں تو خرّادمشین کے عین پیچھےآپ کو نظیری کا یہ بے نظیر شعر خوبصورت  خطاطی میں لکھانظر آئےگا۔

نِیست درخُشک وتر بیشہِ من کوتاہی

چُوبِ ہرنخل کہ منبرنہ شود، دارکُنم

       اس کامطلب بڑا دلچسپ ہے۔ شاعر فرماتےہیں کہ میرے صحرا میں کوئی بھی خُشک یا تر چیز ایسی نہیں جو بے کار ہو۔اگر میں دیکھوں کہ کسی درخت کی لکڑی منبر ومخراب جیسی شاندار چیز بننےکےقابل نہیں، تو میں اُسے بھی استعمال میں لے آتاہوں، چنانچہ میں اُس سے دارِ مقتل بناڈالتاہوں۔

       یہی وصف فزلیب میں میرے ساتھی حافظ محمد رضوان کاطُرّہِ امتیازہے۔ رضوان ایک تکنیک کارہیں جودھات، لکڑی اور گوناگوں قسم کے پلاسٹک کے سامان سے جیتےجاگتے،اُچھلتے کودتے،رواں دواں سائنسی آلات بناڈالتےہیں۔ہواکے دباؤکوقابومیں لاناہو، اپنی مرضی کےاوقات میں کوئی صوتی آہنگ بجانا ہو، بظاہر نامانوس آلات کو آپس میں بے عیب انداز میں جوڑ دینا ہو، یا کوئی نہایت پیچیدہ آلہ بنانا ہو جو پچاس ہزاروولٹ سہہ سکنے کی صلاحیت رکھتاہواور ایک منٹ میں ایک مائکرولیٹر جتنا مائع کسی اور مائع میں تحلیل کرنے کی قابلیت رکھتاہو، تورضوان صاحب ایک ہنرمند تخلیق کار کی طرح نمودار ہوں گےاور سائنسدان کی ضرورت کو عملی جامہ پہنانے کےلیے کمرکس لیں گے۔ ڈیزائن سے لےکر، مٹیریل کے انتخاب اور جدید ترین مشینوں پہ ان کی تخلیق تک کے مراحل رضوان اور اُن کی ٹیم اِس خوبی سے سرانجام دیتےہیں کہ بےساختہ واہ کیے بغیر چارہ نہیں رہتا۔

              اس طرح فزلیب کی ورکشاپ ہر ماہ لاکھوں روپے کی مالیت بچانےمیں کامیاب ہوتی ہے، وہ پیسہ جو بیرونِ ملک درآمدات پہ خرچ ہوناہوتاہے،اب کسی اور کام آتاہے۔ رضوان اور ہمارے دیگر ساتھیوں کے بنائےہوئے سائنسی آلات ہزاروں طلبہ وطلبات، خواہ وہ لمز میں ہوں یا اُس سے باہر، استعمال کرچکے ہیں۔ ہماری تحقیق سرگرمیاں بھی اس تکنیکی مدد کےبغیر نامکمل بلکہ ناممکن ہیں ۔

       مجھے دلی خوشی ہےکہ حافظ محمد رضوان لمز یونیورسٹی کی طرف سے جاری  کردہ بہترین خدمت کے پہلےاعزاز کے مستحق قرار پائے۔ وہ واقعی اپنے دستِ ہنر سےمسِ  خام  کوکندن بنادیتےہیں۔مجھے ان کے ساتھ کام کرنے میں فخر محسوس ہوتاہے اور میں ان کی مزید ترقی کےلیے دُعاکرتارہوں گا۔

                                                                                                                                       محمد صبیح انور

پروفیسر فزکس،لمز

---

سائنس اور ٹیکنالوجی کی کہانیاں

       جب میں نے ۲۰۰۷ء میں امریکہ سےواپس آنے کےبعد سکول برائے سائنس اور انجینئرنگ، لمز میں بطور اُستاد اور محقق قدم رکھا،تومیرےسامنے ایک خالی کمرہ تھا۔ ایک سال بعد طلبہ کی پہلی جماعت  نے داخل ہونا تھا اور میرے ذمے یہ احساس تھا کہ اِن  طلبہ کےلیے مُجھےفزکس کی ایک  شاندار اور فِکرانگیز تجربہ گاہ بنانی ہے۔چنانچہ میں نے اپنے چھوٹے سےکمرے کو تجربہ گاہ  بنالیا۔ وائس چانسلر ڈاکٹر ظہور احمد اور بعدازاں ڈاکٹراحمد دُرانی سے خصوصی رقم کی دستیابی کا وعدہ لیا اور کام میں جُت گیا۔

 

       آنجہانی صہیب شمیم سے آکسفورڈ ہی سےدوستی تھی۔اُن کے ساتھ مل کے نئے تجربوں کی تخلیق کا بیڑااُٹھایا۔عمرحسن، رابعہ ودود،علی حسن، عظیم اقبال، کنیزآمنہ اور اسماء خالد کے ساتھ مل کےنئے افکار کی تلاش کے بعد نیا سامان خودہاتھوں سے بنایااور ۲۰۰۸ء میں ڈیڑھ سو کے لگ بھگ ہشیار بچوں کے سامنےایک نیم تیارشدہ کمرے میں پہلی مرتبہ فزکس کی ابتدائی تجربہ گاہ پیش کی اور اطمینان کی کبھی نہ ختم ہونے والی دولت حاصل کی۔ ڈاکٹرعمر حسن اب رٹگرز یونیورسٹی میں اور ڈاکٹر اسماء خالد ملبورن یونیورسٹی میں تحقیق اور تدریس کی جدید رفعتوں کوطے کرکے ہم سب کوحیران کررہےہیں۔

 

       سائنس اور فزکس کی تعلیم تجربوں کے بغیر بانجھ ہوتی ہے۔ تجربوں کی اپنی ایک الگ دنیا ہوتی ہے جوخالص نظریّے کی دُنیا سےمختلف ہوتی ہے۔ ایک ماہر  تجربہ کار ایک متحمل اور بُردبار شخصیت کامالک ہوتاہے جو عرق ریزی سے حرارت پیما کے  سیمابی وجود کو ٹکٹکی باندھ کے دیکھتاہے، دُوربین کے عدسے سے کسی دُور افتادہ ستارے کےجھرمٹ کو پہروں تکتارہتاہےاور نہایت ایمانداری سے اپنے تمام مشاہدات کو دفترِ قرطاس پہ قلمبند کرتاچلا جاتاہے۔ وولٹ پیما کی سوئی کی ہلکی سی جُنبش اس کے چہرے پہ مسکراہٹ بکھیردیتی  ہے۔ موٹر کی گراریوں کی آواز اُسے بےچین کردیتی ہے اور لیزر شعاعیں جب پردے پہ ایک خوش رنگ نقش بکھیرتی ہیں، تو اس کی سانس تیزچلنے لگتی ہے۔ مشاہدہ کار نہایت عاجزی سے اپنی کائنات اور اپنے تجربات کے آئنے میں اپنی بے مائگی کوبھی سنوارتا رہتا ہے۔  تجرباتی سائنس دان جب اپنے تجربوں سے حاصل ہونے والی مقداروں کو تحریر کرتاہے تو نہایت ایمانداری سے مقداری بےیقینی (Uncertainty) کو بھی لکھتا ہے، تجربوں کی فِکری حدُود کی نشاندہی کرتاہے اور اِس طرح اپنی عاجزی کا برمَلا اقرار کرتاہے۔پچھلے چودہ پندرہ سالوں ںیں  میری ہمیشہ یہی کوشش رہی ہے کہ لمزمیں فزکس کی تجربہ گاہ،     جِسے ہم فِزلیب (Physlab) کہتےہیں، اِسی طور شاگردوں کی ذہن سازی اور شخصیت کی صنّاعی کرسکے۔ چنانچہ میرے نزدیک  فزلیب  بنانے  کاعمل شخصیتوں کوسنوارنے کےعمل کے مترادف ہے۔

 

       آپ جانتے ہوں گےکہ ہمارے مُلک میں عام  طورپریہ  سمجھا جاتاہےکہ جب تک ہم مہنگے داموں بیرونِ ملک سےبہترین آلات منگوا کے اپنی درسگاہوں کی زینت نہیں بنائیں گے، ہم سائنسی تحقیق کے سمندر کی موجزنی نہیں کرپائیں گے۔ یہ تاثُّر صرف ایک حد تک درست ہے۔ تدریسی نقطہِ نگاہ سے بننے والی تجربہ گاہوں میں یہ اصول پوری طرح لاگو نہیں ہوتا۔ بلکہ اِس میدان میں تو”آپ کاج، مہاکاج “ کے مصداق خود ہاتھ سےاپنے آلات بنانا اور پھر اِن آلات کو حُسنِ ترتیب کے ساتھ جوڑ کے ایک بڑا تجربہ بناڈالنا ہی عملی فزکس کی معراج بن جاتاہے۔ یہ خود ساختہ تجربے ایک تو نہایت سَستے ہوتےہیں، دوسرا،  اُن کو بنانے کے سفر میں فزکس کے نِت نئے پہلو اُجاگر ہوتےہیں اور کتابوں میں بند نظریّے جیتےجاگتے، رنگ برنگ صورتوں میں  تجسیم پاکرذہن کےدریچوں کو وَا اور سمجھ کے افقوں کوزیرکرتے نظر آتے ہیں۔گویاحَسَن کوزہ گر کے بنائے ہوئے مٹی کےپیالے بولنا شروع کردیتے ہیں! اپنی مددآپ سےبنے ہوئے۔

 

تجربے شاگردوں میں سائنسی اور طبیعی شعور اُجاگر کرنے میں، برآمدشدہ، زرق برق اور چمکتے دمکتے مگرغلافوں  میں بند تجربات کی نسبت بہت زیادہ مُفید ہوتےہیں۔ گویا   فزکس  کی تجربہ گاہ اِس خود پروری  کے نتیجے میں ایک مستعد کارخانہ بن جاتی ہے، اورساکت وجامد نوادرات کا شیش محل نہیں بنی رہتی۔ اِن آلات کے خراب ہونے کا ڈربھی جاتارہتاہےکہ آخرآپ نے یہ آلات خود بنائے ہیں، انہیں مرمت کرنا بھی تو آپ کےبس میں ہوگا۔ خرابیوں کا سُراغ لگانا بھی نہایت آسان ہوجاتا ہے    ۔

 

بقولِ غالب :

اور بازار سےلےآئے، اگر ٹوٹ گیا

ساغرِجم سے میرا جامِ سفال اچھاہے   

  

 

ایسی توانا تجربہ گاہ تخلیق کی جاتی ہے، تعمیر نہیں۔ میں نے یہی جذباتی تحریک اپنے کام میں استعمال  کی۔ چنانچہ سب سے پہلے میں نےایک خرادمشین خریدی، وہ بھی کباڑیے سے۔ فِزلیب بنانے میں تکنیکی ماہرین  کو،جن میں حافظ رضوان ، محمدیوسف اور خادم محمود سرِفہرست ہیں،  اپنی انجمن میں شامل کیا اور ان کی مدد سےفزکس کے اصولوں  پہ مبنی تجربات کا سانچہ ذہن میں بٹھایا، آلات کے     ڈیزائن    کو       آگے          بڑھایا،      تجربوں سے حاصل ہونےوالی متوقع مقداروں کا بیش آمدگی سُراغ لگایا اور پھر اپنی نئی تعمیر کردہ کارگاہ میں نئے نئے آلات بنائے۔بہت سےتجربوں کو کمپیوٹر کےساتھ جوڑا تاکہ تجرباتی مقداروں کو سہولت کےساتھ  اور وافِرمقدار میں حاصل کیاجاسکے اور پھر مقداری تجزیے(data analysis) سے کام لیتےہوئے قیاس اور استنباط، پیش گوئی اوراستخراج کی منزلیں، جو سائنسی رویے کاحصّہ ہیں ، بروئےکار لایا جاسکے اور نتیجتاً فِزکس درسی کتابوں کی قید سےنکل کے عمل کی جولا نگاہ میں داخل ہوسکے اور  ہمارے ہزاروں طلبہ وطالبات فزکس کی حیرت انگیزیوں کی خوشہ چینی  کرسکیں۔ 

 

       الحمدُللہ، اب فزلیب مُلک  میں تجرباتی فزکس کی عملی تربیت کے لیے ایک مثالی آماج گاہ بن چکی ہے۔ ہمارے پاس بنیادی سے لے کر  عالی  درجوں کےتجربات تیار ہیں۔ یہ تجربے ہرلحظہ بدلتےبھی رہتے  ہیں اور فزکس کی تمام شاخوں کا احاطہ کیے ہوئے ہیں۔ چند مثالوں سے ان تجربات کی نوعیت واضح کی جاسکتی ہے۔ ابتدائی تجربہ گاہ میں ایک تجربہ مائع نائٹروجن  کی حرارتِ مخصوصہ (specific heat) ناپنے سے تعلق رکھتاہے۔ایک چھوٹے سےکپ میں مائع نائٹروجن اُنڈیلی جاتی ہے۔یہ کپ ایک برقی ترازو (electronic balance)یہ دھراہے۔ نائٹروجن کی تبخیر(evaporation) سے  وزن رفتہ رفتہ کم ہوجاتاہے۔وقت اور وزن کاڈیٹا کمپیوٹر پہ منتقل ہوتاہےاور طلبہ اِسےایک متحرک گراف (graph) میں دیکھتے ہیں۔ اس عمل کےدوران     نائٹروجن      میں          ایک            مزاحم (resistor)      میں  سے    مخصوص وقت کے   لیے   برقی رَو(current) گزاری جاتی ہےجِس سے مزاحم گرم ہوتاہےاور تبخیر کاعمل تیز ہوجاتاہے۔ کچھ دیر بعد برقی روروک دی جاتی ہے اورتبخیر کی قدرتی رفتار ایک بارپھربحال ہوجاتی ہے۔تبخیر کی قدرتی اور برقی رفتار کےموازنے سے طلبہ کو دعوت دی جاتی ہےکہ وہ نائٹروجن کی حرارتِ مخصوصہ معلوم کریں۔ اب ظاہر ہےاس تجربےکی مددسے گراف اور اس کی وضع قطع کافہم بھی سیکھاجاتاہے، حراریات (thermal physics) اور برقیات (electricity) کا باہمی تعلق بھی نمایاں ہوتاہے اور توانائی کے استقرار (conservation) کا عملی مظہر بھی کھلی آنکھوں نظرآتاہے۔ اس تجربے میں استعمال ہونے والے سب آلات فِزلیب ہی کی پیدوار ہیں۔برقی ترازو سےلےکے فزلاگر تک،جو مقادیر (quantities)کوکمپیوٹر میں منتقل کرتاہے،عمرحسن اور اس کے ساتھیوں نے تخلیق کیے ہیں۔ 

 

       ایک اورتجربے میں لوہے کی ایک لمبی افقی پٹی کی سطح پرباریک سوراخ بنائے گئے ہیں۔ اِس پٹی کا اندرونی حصّہ خالی ہےاور اِسے ایک ہواکے پمپ(Pump) سےمنسلک کیا گیاہے۔ہوا تیزرفتاری سے ان باریک سوراخوں سےخارج ہوتی ہے اور پٹی کے متوازی ایک تہ بنادیتی ہے۔اس تہ پہ گیٹیاں بہت معمولی مزاحمت سے فرّاٹے بھرتی ہوئے  گزرتی ہیں ۔ان کی رفتار اور اسراع معلوم کرنے کےلیے بصری کِواڑ (photogate) فِزلاگرسے منسلک کیے گئے ہیں۔ اب ان گیٹیوں پہ معلوم اوزان کےذریعے معلوم قوت لگائی جاتی ہےاور ان کا اسراع معلوم کرکے نیوٹن کے المشہور             F=ma  قانون  کی تطبیق تلاش کی جاتی ہے۔ 

 

       اِسی طرح کے تقریباً سو کے قریب تجربے اس  وقت فِزلیب کی زینت ہیں۔ میرے لیے فِزلیب میں آنا ایک مشاہدہ گاہ اور عجائب گھر کی سیر سےکم نہیں۔ کہیں گیندآپس میں ٹکرانے کی دھمادھم ہے، توکہیں  مائعات کے بخارات کی صفیری آوازیں۔ کہیں پنڈولم درویشانہ گھوم رہےہیں تو کہیں کوئی مصروف طالبِ علم دُنیا ومافیہا سے بےخبرپانی کے اٹکےہوئے قطروں کے ٹپ ٹپ گرنے کا انتظار کررہا ہے۔  اس کےلیے وقت جیسے رُک ساگیا ہے، 

 

لے   سانس  بھی  آہستہ  کہ نازک ہے بہت کام

آفاق                 کی               اِس               کار               گہِ            شیشہ            گری                کا

 

   

 

    فِزلیب میں ہر طرح کے تشنگانِ علم کےلیے سامانِ حیرت ہے۔ریاضی کےدلدادہ مقناطیسی پنڈولم سے کھیل سکتے ہیں۔ڈیٹا کے شائقین تصویروں کی جانچ پڑتال کرسکتےہیں۔ہاتھ سے کام کو پسند کرنے والے مہندسین کےلیے لکڑی کےٹکڑوں کو جوڑ کر متوازن پُل بنانے کی آزمائش کےدوران تفریح کے ساتھ ساتھ سائنسی حکمت  حاصل کرنےکے مواقع بھی ہیں۔ نُوریات کےشایقین کےلیے گوشہِ اِبنِ سہل سات آٹھ دلچسپ نوری تجربوں (optical experiments) کا میدان ہے۔بہت سے تجربات کیمرے اور سمارٹ فون کی مدد سےبھی کیے جاتےہیں۔ کئی نوبل انعام یافتہ تجربوں کی جدید اور معاصر صورت بھی فِزلیب میں دکھائی دے گی جیسے ۱۹۱۰ءکا پِیرِن(Perrin)  کا تجربہ ایک جدید خوردبین کی مددسے نئے روپ میں جلوہ گر ہے۔اِس تجربےمیں پولی سٹائرین کے مائکرو دانے (polystyrene microspheres) پانی کی ایک باریک سی تہ میں خوردبین کےنیچے دیکھے جاتےہیں اور ہمارے تیارکردہ سو فٹ وئیر Phystrack کےذریعےان کے مقامات کو وقت کے دھارے پہ متعین کیا جاتاہے جس سےبےربط(random) اعمال کی فزکس سمجھنے میں بےحد  آسانی ہوجاتی ہے اور ایک تاریخی اہمیت کے حامل تجربے کوبھی ازسرِنوزندہ کرلیاجاتاہے۔

 

       فِزلیب کی تیاری میرے لیے چشم کُشا اور ذہن کُشاتھی۔ مجھے جو تھوڑی سی فِزکس آتی ہے، اس کا بڑا سہرااِنھی تجربات کی تیاری کےسر ہے۔اس تجربہ گاہ کاتعلیمی نصاب کسِی نظریاتی نصابِ تدریسی (theoretical coursework)  کا  مرہونِ منت نہیں۔ میں اس قبیل کے پروفیسروں  سے تعلق رکھتا ہوں، جِس کے مطابق تجرباتی سائنس خود نظریات کوتشکیل دینے میں اہم کردارادا کرسکتی ہے۔ اِسی طرح  فِزلیب کی کوکھ سے جنم لینے والی تنظیم قوسین سائنٹیفک کم خرچ پہ سائنسی آلات بنانے کے رستےپہ گامزن ہے۔ اُمید ہےکہ آلات اورخیالات کایہ ادل بدل، فزکس کی دُنیا میں، ہمارے نوجوانوں کے ذہنوں کو کھول کے اُنہیں فطرت کےاسلوب کوسمجھنے اور بالآخرتسخیر کرنے کےلیے ایک خوداعتمادی عطاکرےگا۔ ہماری تجربہ گاہ اِسی جذبے کی سر شاری میں  قائم ہوئی اور یہی جذبہ اِسے آگے بڑھنے پہ مجبور کرتاہے۔ 

 

انسانی عقل و دانش نے کئی مرتبہ سینکڑوں دریاؤں کو سینکڑوں کوزوں میں بند کرنے کی ہمّت کی ہے۔ لیکن کیا اسی کوزے میں پوری کائنات کو بھی بند کیا جا سکتا ہے یا نہیں؟ لگتا ہے کائنات میں تو یہ کام ازلوں سے جاری و ساری ہے، گویا ایک شاندار انجمن ہر ذرّے میں موجود ہے ،

 

دلِ ہر قطرہ میں ہے سازِ “اناالبحر”

 

 

قدرت کی فراست یقیناً بے مثال ہے! ان مخفی پرتوں سے پردہ اٹھانے کے لیے انسان کئی سو سالوں سے بے چین رہا ہے۔ ٹیکنالوجی میں جدت کے آنے سے ہمارا کام کافی حد تک آسان ہو چکا ہے۔ اس جدت کی ایک لازوال مثال اسکیننگ الیکٹرون مایکروسکوپ ہے, جس کی باریک بینی سے چھوٹے سے چھوٹا ذرّہ بھی چھپ نہیں سکتا۔

لمز کے اسکول برائے سائنس اور انجینئرنگ میں مرکزی لیب نصب ہے۔ یہ وہ جگہ ہے جہاں جدید ترین تحقیقی آلات کے گٹھ جوڑ سے تحقیق دان دن رات  پیچیدہ تجربات کو سرانجام دیتے ہیں اور سحر آمیز نتائج حاصِل کرتے ہیں۔ یوں معلوم ہوتا ہے کہ انسان جب حقیقت کی کھوج میں مصروف ہو جاتا ہے تو ہر قسم کی سماجی و ثقافتی رکاوٹوں کو بالائے طاق رکھ کر دیگر متجسس اشخاص تک رسائی کرنے کی پوری کوشش کرتا ہے کہ،

 

مشرق سے ہو بیزار نہ مغرب سے حذر کر

فِطرت کا اشارہ ہے کہ ہر شب کو سحر کر

 

 

اس جستجو کا ایک مظہرحال ہی میں منعقد کی جانے والی تین روزہ تربیتی مشق کے دوران دیکھنے کو مِلا، جس میں مختلف تعلیمی و تحقیقی اداروں سے لوگوں نے شرکت کی۔

دراصل اس مشق میں اسکیننگ الیکٹرون مایکروسکوپ کے مختلف پہلوؤں کو قریب سے جانچا گیا۔ مایکروسکوپ کے پرزوں کی فعالیت سے لے کر نمونوں کو نصب کرنے کے جدید اور مؤثر طریقوں کا جائزہ لیا گیا۔ اس کے ساتھ ساتھ ہر نشست کے آخر میں شرکا کو بین الاقوامی سطح کے مائہ ناز سائنسدانوں کی گفتگو سے مستفید ہونے کا موقع مِلا۔ ان میں لمز سے ڈاکٹر سلمان نوشیر ارشد اور امریکہ سے ڈینیل فیفر شامِل ہیں۔

اس مشق میں کُل ۱۲ لوگ شریک ہوئے، جن میں پی-ایچ-ڈی اور ایم-فل طلبہ بھی شامل تھے۔ شرکا نے تربیتی مشق کے حوالے سے اپنے خیالات کا اظہار کرتے ہوے بتایا کہ یہ ورکشاپ اُن کے تکنیکی ہنر کو مزید نکھارنے میں موثر ثابت ہوگی۔ شرکا نے مرکزی لیب کےتحقیقی آلات کو باقاعدگی سے استعمال کرنے پر لمز کی قیادت کی دُور اندیشی کو سراہا۔ ان کا کہنا تھا کہ مستقبل میں اس نوعیت کی مزید تقریبات منعقد ہوتی رہنی چاہییں۔

شعبہِ طبعیات سے وابستہ ڈاکٹر عطاء الحق نے اس مشق کو ترتیب دیا اور ان کے دیگر ساتھی، بالخصوص ڈاکٹر مرتضیٰ سلیم، ڈاکٹر کمیل عباس اور سیّد زاجِف حسین نے ایک موثر لائحہ عمل کے تحت اپنی تکنیکی مہارت سے سب شرکا کو مستفید کیا۔

مرکزی لیب کے بارے میں مزید جاننے کی لیے کلِک کریں

 

 

 کسی بھی زبان کی شاہراہِ ترقی کا ایک سنگِ نشان یہ بھی ہوتا ہے کہ اُس زبان میں مختلف انواع کے مضامین اور موضوعات کس قدر اور کس طرح ادا کیے جا سکتے ہیں؟ اردو زبان کے بارے میں عام طور پر خیال کیا جاتا ہے کہ سماجی اور عمرانی علوم سے متعلق مباحث تو اِس زبان میں کسی قدر سہولت سے ادا کیے جا سکتے ہیں مگر یہ زبان جدید سائنسی مباحث، بڑی حد تک بیان کرنے سے قاصر ہے۔

یہ رائے عام طور پر زیادہ تر عمومی ناواقفیت اور چند غلط فہمیوں کی زائدہ ہے۔ یہ بیّن حقیقت ہے کہ اردو زبان میں متفرق سائنسی موضوعات کو بیان کرنے کی خاطر متعدد کوششیں اٹھارھویں صدی کی تیسری دہائی ہی میں شروع ہو گئی تھیں۔ مثلاً حیدر آباد دکن میں ۱۸۳۴ء میں نواب شمس الامراء کی سرپرستی میں ایک ’دارالترجمہ‘ کی بنیاد رکھی گئی، جہاں ریاضی، طبیعات، کیمیا، علم الادویہ، جیومیٹری، فلکیات اور دیگر علوم پر مختلف کتب یورپی زبانوں سے اردو میں ترجمہ کی جاتی تھیں۔ اسی دور میں لکھنؤ میں اودھ کے بادشاہ نصیر الدین حیدر کی سرپرستی میں سائنسی علوم سے متعلق چند کتب انگریزی سے اردو میں منتقل ہو رہی تھیں۔

The History of Rasselas: Prince of Abissinia 
سیموئل جانسن کا ایک معروف انگریزی ناول، جس کو اردو میں ’تواریخ راسلس‘ کے عنوان سے منتقل کرنے والے کمال الدین حیدر عرف محمد میر لکھنوی کا نام اس حوالے سے قابل ذکر ہے کہ انھوں نے اس دور میں سائنسی موضوعات پر تقریباً اٹھارہ کتب کو اردو میں منتقل کیا ۔ ۱۸۲۵ء میں قائم ہونے والے دہلی کالج اور اسی کالج میں ۱۸۴۳ء میں قائم ہونے والی دہلی ٹرانسلیشن سوسائٹی کی خدمات بھی اس حوالے سے بہت نمایاں ہیں۔ کالج اور سوسائٹی کے زیر اہتمام متنوع علوم پر تقریباً سوا سو کتب ترجمہ کی گئیں، جن میں نمایاں تعداد سائنسی کتب کی تھی۔ سوسائٹی کے کارپرداز اس حوالے سے خاصے روشن خیال ثابت ہوئے کہ اس زمانے میں انھوں نے اردو میں ترجمے کے جو اصول وضع کیے تھے، بڑی حد تک آج بھی غیر متعلق نہیں ہوئے ہیں۔

انیسویں صدی ایسے ہی اداروں اور کاوشوں میں ایک نام تھامسن سِوَل انجینئرنگ کالج، رڑکی (پہلا نام: سول انجینئرنگ کالج) کا بھی ہے۔ رڑکی، سہارن پور اور ہردوار کے قریب ایک قصبہ ہے، جو اُس وقت شمال مغربی صوبے یا اتر پردیش کا حصہ تھا۔ آج کل رڑکی شہر، ریاست اتراکھنڈ کا حصہ ہے۔ اس کالج کا امتیاز یہ تھا کہ ۱۸۴۷ء میں اس کے قیام سے لے کر تقریباً ۱۸۷۰ء تک، ہندوستانی باشندوں کو سول انجینئرنگ کی جملہ تعلیم اردو زبان میں دی جاتی رہی۔

یہاں اس کالج کے قیام کا مختصر پس منظر بتانا ضروری معلوم ہوتا ہے۔ دوسری اینگلو مراٹھا جنگ (۱۸۰۵ء تا ۱۸۰۳ء)  سے لے کر دوسری جنگ پنجاب (۱۷۴۹ء) کے خاتمے پر انگریز، شمال مغربی صوبہ جات (اُتر پردیش)، صوبہ جاتِ وسطی (مدھیہ پردیش)، بہار، مہاراشٹر، گجرات، راجستھان، سندھ، بلوچستان، شمال مغربی سرحدی صوبے (خیبر پختونخواہ) پر بلاواسطہ یا بالواسطہ متصرف ہو چکے تھے۔ ان علاقوں پر سیاسی لحاظ سے غلبہ برقرار رکھنے کے لیے ضروری تھا کہ یہاں کے قدرتی وسائل (مثلاً دریاؤں، زرخیز زمینوں، زرعی پیداوار وغیرہ) سے حتی المقدور فائدہ اٹھایا جائے۔ دوم یہ کہ یہاں پہ عمومی ترقیاتی کاموں کا جال سا بچھایا جائے۔ مثلاً پہلے سے موجود سڑکوں کو ترقی دی جائے، نئی سڑکیں اور راستے بنائے جائیں، ریلوے ٹریک بچھائے جائیں، تار (ٹیلیگراف) کا نظام قائم کیا جائے وغیرہ وغیرہ۔ اس حکمتِ عملی کا انھیں دوہرا فائدہ یہ ہونا تھا کہ جہاں یہ کام ہندوستانی باشندوں کی نظر میں ان کی قدر بڑھاتے وہیں ان سب علاقوں میں انگریز سپاہ کی بآسانی نقل و حمل اور دور دراز کے علاقوں تک ان کی رسائی کو ممکن بناتے۔ یوں انگریزی اقتدار کی قوتِ نافذہ میں اضافہ ہوتا۔ ان مشکل اور طویل مدتی منصوبوں کے لیے ماہر سول انجینئرز اور ان کے معاونین کی ضرورت تھی جو اس نوعیت کے کاموں کو تکمیل تک پہنچا سکیں۔ 

یوں تو اس زمانے میں شمال مغربی صوبے (اتر پردیش) میں انگریزوں کے زیرِ انتظام تین کالج (دہلی کالج، آگرہ کالج، بنارس کالج) قائم ہو چکے تھے اور ۹ اینگلو ورنیکولر اسکول بھی خدمات انجام دے رہے تھے، مگر فنّی اور تکنیکی تعلیم کے لیےمخصوص ادارہ کوئی نہیں تھا۔ لہٰذا کمپنی کے مقبوضات میں عام طور پر اور خاص کر شمال مغربی صوبے میں جاری عمومی ترقیاتی کاموں کے لیے اہلکار کو مہیا کرنے کے لیے ۲۵ نومبر ۱۸۴۷ء کو سول انجینئرنگ کالج، رڑکی کا قیام عمل میں لایا گیا۔ ابتدا میں کالج کا نام کالج آف سول انجینئرنگ رکھا گیا اور لیفٹیننت آر۔میکلیگن کو کالج کا پرنسپل مقرر کیا گیا۔ ۱۸۵۴ء میں کالج کا نام تبدیل کر کے تھامسن انجینئرنگ کالج، رڑکی رکھ دیا گیا۔ آغاز میں طلبہ کے تین زمرے قائم کیے گئے، دو  زمرے یورپی کمیشنڈ اور نان کمیشنڈ افسروں کے لیے جبکہ تیسرا زمرہ مقامی ہندوستانی طلبہ کے لیے مخصوص کیا گیا۔ کالج کے قیام سے لے کر کم از کم ۱۸۷۰ء تک ہندوستانی طلبہ کے لیے ذریعہ تعلیم کے لیے اردو زبان کو اختیار کیا گیا۔ کالج کی مساعی سے قبل سول انجینئرنگ کے موضوعات پہ اردو میں کوئی کام نہیں ملتا تھا۔ اگرچہ ریاضیات، ہیئت، فلکیات، جغرافیہ، جبر  و مقابلہ، مساحت وغیرہ پہ کچھ نہ کچھ مواد ہم دست تھا لیکن سول انجینئرنگ سے متعلقہ موضوعات اردو میں منتقل نہیں ہوئے تھے۔ لہٰذا کالج انتظامیہ نے اس حوالے سے بنیادی نوعیت کے مضامین پر کتب ترجمہ کروانی شروع کیں۔ 
اس سلسلے کا آغاز ۱۸۵۰ء سے قبل ہی ہو گیا تھا۔ ۱۸۵۰ء کے بعد سے تسلسل سے مطبوعات سامنے آنا شروع ہو گئیں۔ زیادہ کتب تو اردو میں ہی شائع ہوئیں لیکن چند کتب ناگری حروف میں بھی شائع ہوئیں۔ اس زمانے کی چند دستیاب کتب بکھری ہوئی حالت میں برصغیر کے مختلف کتب خانوں میں موجود ہیں۔  

راقم کی تلاش و تحقیق کے نتیجے میں پہلی مرتبہ رڑکی کالج سے شائع ہونے والی چونتیس (۳۱ اردو اور ۳ ناگری حروف میں) کتب کی فہرست تیار کی گئی ہے۔ ذیل میں ایک جدول ترتیب دیا گیا ہے جس کے ذریعے کتب کے نام، ان کے مصنفین و مترجمین، سنہ اشاعت اور تعداد صفحات، جیسی معلومات درج کی جا رہی ہیں۔ جہاں کچھ معلومات میسر نہیں آ سکیں وہاں --- کا نشان لگا دیا گیا ہے۔ یہ فہرست چونکہ اب تک کے تحقیقی کاموں میں پہلی مرتبہ مرتب کی گئی ہے، اس لیے اس میں مزید بہتری کی گنجائش یقیناً باقی ہے۔  
 
کالج کی دستیاب تصانیف و تالیفات کے جائزے سے یہ بات واضح ہوتی ہے کہ کالج کے نمایاں مصنفین و موَلفین میں رائے منّو لال (فرسٹ نیٹو ماسٹر بعد ازاں ہیڈ نیٹو ماسٹر)، لالہ بہاری لال (فرسٹ نیٹو ماسٹر،بعد ازاں ہیڈ نیٹو ماسٹر)، کنہیا لال (سب اسسٹنٹ سول انجینئر)، شنبھو داس (اسسٹنٹ نیٹو ماسٹر، نیٹو سروینگ ماسٹر)، شیخ بیچا (اسسٹنٹ نیٹو ماسٹر، سیکنڈ نیٹو ماسٹر)، موہن لال اور جگ موہن لال شامل تھے۔ 

عموماً کالج سے چھپنے والے رسائل کے سرِ ورق کی عبارت یوں ہوتی تھی:

رسالے 

جو کہ واسطے طلبائے مدرسہ رڑکی کے تیار 

کیے گئے ہیں 

رسالہ نمبر دوم 

در باب مضبوطی اشیائے سامان عمارت کے 

ترجمہ کیا ہوا منو لعل 

اول نیٹو ماسٹر مدرسہ رڑکی کا سنہ ۱۸۵۱ء 

کالج کی تاسیس کے وقت سے تقریباً ایک چوتھائی صدی تک مقامی ہندوستانیوں کو اردو زبان میں ہی تعلیم دی جاتی رہی۔ اس مقصد کے لیے ان موضوعات سے متعلق زیادہ تر انگریزی کتب کو اردو میں منتقل کیا گیا۔ افادی پہلو کو مد نظر رکھتے ہوئے کالج کے نصاب میں شامل کتب ہی اس کام کے لیے منتخب کی گئیں۔ 

یہ نکتہ بھی قابلِ توجہ ہے کہ کالج میں ہندوستانی طلبہ کی تدریس کے لیے ذریعہَ تعلیم، اردو زبان کو منتخب کیا گیا۔ کالج کیلنڈر ۱۸۷۱ سے ۱۸۷۲ء میں کالج کے ہندوستانی طلبہ کی فہرستوں پر نظر ڈالنے سے باآسانی اندازہ ہو جاتا ہے کہ کالج میں مسلمان اور ہندو طلبہ کی شرح تقریباً یکساں تھی۔ ہندو طلبہ میں سے بیشتر کا تعلق اتر پردیش سے ہی تھا، اس کے باوجود یہ کالج اردو ہندی تنازعہ سے دور تھا۔ اسی باعث کالج کی بیشتر تالیفات اردو رسم الخط میں جبکہ محض چند ایک کتب ناگری رسم الخط میں شائع ہوئیں۔ اس سے یہ بھی معلوم ہوتا ہے کہ انیسویں صدی کی تیسری چوتھائی تک بھی شمالی ہندوستان میں اردو زبان اور رسم الخط کو بیشتر طبقات میں، مذہبی و ثقافتی بُعد سے قطعِ نظر، قبولِ عام حاصل تھا۔ 

ایک سوال یہ پیدا ہوتا ہے کہ کالج میں ہونے والا تالیفی کام اتنے محدود پیمانے پر کیوں تھا؟ تو یہ بات خاطر نشان رہے کہ تھامسن سول انجینئرنگ کالج، رُڑکی کے قیام کا اصل مقصد سول انجینئرنگ کی تعلیم دینا تھا۔ کالج کے منتظمین کی توجہ صرف اس بات پر تھی کہ تدریسی امور سے متعلق کچھ مواد مقامی طلبہ کے لیے تیار کروایا جا سکے۔ اس مقصد کے حصول کے لیے انھوں نے کالج کے مقامی تدریسی عملے میں سے ہی چند اساتذہ کو منتخب کیا ۔ ان اساتذہ نے نصاب سے متعلق چند ضروری کتب کو اردو میں ترجمہ و تالیف کیا۔ اس کوشش میں ان اساتذہ کی ذاتی لیاقت ہی کام آئی۔ ان کی رہنمائی کرنے کو کوئی باقاعدہ ادارہ بھی نہ تھا اور نہ ہی کوئی سرپرست تھا۔اسی باعث کالج میں ہونے والے تصنیفی و تالیفی کام کی تنگ دامانی کھٹکتی ہے مگر اس کے باوجود کالج کے اساتذہ کا یہ امتیاز ہے کہ انھوں نے مقدور بھر کام کے ذریعے ایک نئے چلن کی بنیاد رکھی۔ 

کالج میں ہونے والے تالیفی کام میں موضوعات کے ساتھ ساتھ ان کی پیشکش میں بھی خاصا تنوع پایا جاتا ہے۔ گو موضوعات زیادہ تر سول انجینئرنگ سے ہی متعلق ہیں مگر اکثر ریاضی اور جغرافیہ کے موضوعات سے بھی اعتنا کیا گیا ہے۔ اپنے موضوعات کے تناظر میں کالج کی کتب میں زیادہ تر عملی مشقوں سے متعلق مباحث ہوتے تھے۔ اسی طرح عملی نوعیت کے سوالات اور ان کے حل ہوتے تھے۔ کالج کی تالیفات کے معتدبہ حصوں میں عملی نوعیت کے سوالات اور مشقیں دیکھی جا سکتی ہیں۔ شکلوں اور تصاویر کے ذریعے موضوع کی وضاحت کی جاتی تھی۔ ان کتب کی نثر بھی اکثر و بیشتر صاف تھی اور اس میں اتنی صلاحیت تھی کہ وہ تکنیکی و فنی موضوعات کو بغیر کسی اشکال کے منطقی طور پر پڑھنے والے تک پہنچا سکے۔  

رڑکی کالج میں اردو زبان میں سول انجینئرنگ کے مضامین بیان کرنے کی اس ابتدائی کاوش کے بعد ایک طویل عرصے تک ہمیں اور کوئی کاوش نظر نہیں آتی۔ ۱۹۱۷ء میں جامعہ عثمانیہ اور پھر دارالترجمہ کے قیام نے پھر اس چراغ کو روشن کیا۔ اس ضمن میں یہ امر قابل توجہ ہے کہ منتشر اور وقفے وقفے سے ہونے والی ان کاوشوں کی افادیت کے باوجود مستقل انگریزی ذریعہ تعلیم نے یہ خیال عام کر دیا کہ اردو زبان سائنسی و تکنیکی مضامین بیان کرنے سے بیشتر معذور ہے۔ 

اردو میں تھامسن انجینئرنگ کالج، رڑکی کے اساتذہ، مترجمین و مؤلفین کی یاد نگاری  نہ ہونے کے برابر ہے۔ یہ بات ضرور نشانِ خاطر رہے کہ یہی لوگ تھے جنھوں نے اردو میں خالص فنی و تکنیکی موضوعات بیان کرنے کی داغ بیل ڈالی۔ انگریزی کتب کو ترجمہ کیا، ان کے موضوعات میں مقامی حالات کے تحت اضافے بھی کیے۔ تراجم و تالیفات میں قابلِ ذکر تنوع ہونے کے باوجود اندازِ نثر کی اِکسانیت قائم کرنے میں کافی کامیاب رہے۔ اس اندازِ نثر میں اتنی صلاحیت تھی کہ معمولی خواندہ شخص بھی بغیر کسی اشکال کے زیرِ بحث موضوع کی تفہیم میں آسانی محسوس کرتا تھا۔ تیزی سے کروٹیں لیتے وقت کی زد میں، یہ فاضلین بے شک گم نام سہی مگر ان کے کام کی افادیت اور اہمیت بہرحال مسلّم ہے۔